Afət Ziyadqızı
ABŞ Prezidenti Donald Tramp İranla davam edən müharibənin Konqresə aralıq seçkilərindən dərhal sonra sona çatacağını bildirib. O, qarşıdurmanın bitməsi ilə neft qiymətlərinin sürətlə aşağı düşəcəyini iddia edib.
“Operativ Məlumat Mərkəzi-OMM” xəbər verir ki, Tramp Konqres seçkiləri ərəfəsində Respublikaçılar Partiyasının ilk qurultayı üçün Texas ştatına yola düşərkən danışıb. Onun sözlərinə görə, Tehran rəhbərliyinin müqaviməti tükənmək üzrədir.
ABŞ Prezidenti İranın ölkəsində keçiriləcək seçkilərə təsir göstərməyə çalışdığını və Tehranın nüvə silahı əldə etməsinə imkan verəcək zəif hökumətin hakimiyyətə gəlməsini hədəflədiyini irəli sürüb.
İran rəhbərliyi isə nüvə silahı hazırlamağa çalışdığı barədə ittihamları rədd etməkdə davam edir. Tramp İranla yeni danışıqların mümkün olduğunu, lakin hazırda bunun gündəmdə olmadığını deyib.
Yeddinci ayına daxil olan müharibənin əvvəlcə cəmi bir neçə həftə davam edəcəyi proqnozlaşdırılırdı. Lakin münaqişənin benzin və ərzaq qiymətlərinə təsiri ABŞ-də ictimai dəstəyin əhəmiyyətli dərəcədə azalmasına səbəb olub.
Yaxın Şərqdə gərginliyin artması və bölgədəki neft obyektlərinin hədəfə alınması qlobal yanacaq qiymətlərini yüksəldib.
