Afət Ziyadqızı
ABŞ Prezidenti Donald Tramp Respublikaçılar Partiyasının noyabrda Konqresə keçiriləcək aralıq seçkilərdə məğlub olacağı təqdirdə Demokratlar Partiyasının onun impiçmenti prosesini başlada biləcəyini bəyan edib. Associated Press agentliyinin məlumatına görə, ABŞ lideri bu barədə Oklahomada tərəfdarları qarşısında çıxışı zamanı bildirib.
"Operativ Məlumat Mərkəzi-OMM" xəbər verir ki, D.Tramp respublikaçıların seçkilərdə qələbə qazanmasının vacibliyini vurğulayaraq: "Qalib gəlməsək, sonda mənə impiçment elan edəcəklər", – deyə xəbərdarlıq edib.
Aralıq seçkilərin əhəmiyyətinə toxunan ABŞ Prezidenti respublikaçı seçiciləri səsvermədə fəal iştirak etməyə və partiyanın namizədlərini dəstəkləməyə çağırıb. O, öz adının bülletendə olmadığı seçkilərdə tərəfdarlarının aktivliyinin nisbətən aşağı düşdüyünü təəssüflə qeyd edib.
Diqqətə çatdıraq ki, bir müddət əvvəl Rusiya Prezidenti Vladimir Putin Ukraynadakı münaqişənin nizamlanması istiqamətində göstərdiyi vasitəçilik səylərinə və diplomatik təşəbbüslərinə görə ABŞ Prezidentinə minnətdarlığını bildirmişdi.
