OMM Redaksiyası
Türkiyənin “Bursaspor” klubunda çıxış edən Azərbaycan millisinin futbolçusu Toral Bayramov yeni komandaya və Türkiyə futboluna uyğunlaşmasından danışıb. 25 yaşlı cinah oyunçusu bildirib ki, futbol baxımından fərqli liqaya keçsə də, mühitə uyğunlaşmaq çətin olmayıb və hər şey gözlədiyi kimi gedir.
Bayramovun sözlərinə görə, karyerasında bundan əvvəl yalnız “Qarabağ”da çıxış etdiyindən “Bursaspor”un oyun sisteminə və fərqli tələblərinə alışmaq ilk vaxtlar çətinlik yaradıb. O, hazırda özünü oynamağa hazır hiss etdiyini, məşqçinin etimadını qazanmaq və inkişaf etmək üçün fərdi çalışdığını qeyd edib.
“Bandırmaspor” üzərində 3:0 hesablı qələbə qazandıqları görüşdə Bayramov ilk dəfə 90 dəqiqə meydanda qalıb və məhsuldar ötürmə verib. Futbolçu matçın yaxşı keçdiyini, lakin daha yaxşı oynaya biləcəyini deyib. O, məşqçilərlə problemi olmadığını, verilən tapşırıqları yerinə yetirməyin futbolçuların işi olduğunu vurğulayıb.
Azarkeşlər və “Sabah”ın oyunu
Bayramov “Bursaspor” azarkeşlərini inanılmaz adlandırıb və onların evdə, eləcə də səfərdə komandanı dəstəklədiyini bildirib. O, Azərbaycanda da tribunaların hər zaman dolu olmasını arzulayıb.
Futbolçu “Sabah”ın turnirdəki oyunlarını izlədiyini, komandanın baxımlı futbol oynadığını və öz oyun üslubuna sadiq qaldığını söyləyib. Bayramov “Sabah”ın Norveçdə “Vikinq”lə qarşılaşmadan qələbə ilə dönəcəyinə inandığını bildirib.
“Qarabağ”da çıxış edərkən Norveçin “Budyo-Qlimt”inə vurduğu qolu isə karyerasının ən vacib və gözəl qolu saydığını deyib. Bayramov belə qollar vurmağa davam etməyə ümid etdiyini bildirib.
