Qazaxıstan Prezidenti Kasım-Jomart Tokayev ölkədə yeni ali məşvərətçi orqanın yaradılmasını nəzərdə tutan "Qazaxıstan Xalq Şurası haqqında" konstitusiya qanununu imzalayıb.
“Operativ Məlumat Mərkəzi-OMM” xəbər verir ki, bu barədə Qazaxıstan Prezidentinin mətbuat xidməti məlumat yayıb.
Məlumata görə, Qazaxıstan Xalq Şurası milli dialoqun inkişafı və vətəndaş cəmiyyətinin ölkənin daxili siyasətinin formalaşdırılmasında iştirakını təmin etmək məqsədilə yaradılıb. Yeni qurum qanunvericilik təşəbbüsü və milli referendum təşəbbüsü hüququ da daxil olmaqla geniş səlahiyyətlərə malik olacaq.
Bildirilib ki, qanun martın 15-də keçirilən ümumxalq referendumunda qəbul edilən yeni Konstitusiyanın müddəalarının həyata keçirilməsi üçün hazırlanıb. Xalq Şurası etnomədəni birliklərin, ictimai təşkilatların, eləcə də paytaxt, bölgələr və respublika əhəmiyyətli şəhərlərin nümayəndələrinin daxil olduğu 42 üzvdən formalaşacaq. Şuranın tərkibi prezident tərəfindən təsdiq ediləcək.
Qeyd olunub ki, üzvlərin səlahiyyət müddəti dörd il olacaq. Şura daxili siyasət məsələləri üzrə təklif və tövsiyələr hazırlamaq, qanunvericilik prosesində iştirak etmək, referendum təşəbbüsləri irəli sürmək, ictimai müzakirələr təşkil etmək və ictimai nəzarətdə iştirak etmək səlahiyyətlərinə malik olacaq.
Bundan əlavə, quruma Dünya və Ənənəvi Dinlər Liderləri Qurultayının təşkili və keçirilməsi səlahiyyəti də verilib. Yeni qanunun qüvvəyə minməsindən sonra "Qazaxıstan Xalqı Assambleyası haqqında" qanunun ləğv ediləcəyi gözlənilir.
