Afət Ziyadqızı
Sloveniyada ölü qarğalarda Qərbi Nil virusu aşkarlanıb.
“Operativ Məlumat Mərkəzi-OMM” xəbər verir ki, ölkədə quşlarda bu virusa sonuncu dəfə 2024-cü ildə rast gəlindiyi bildirilib.
Məlumata görə, bu il Sloveniyada insanlarda Qərbi Nil virusuna yoluxma halı qeydə alınmayıb.
Quşlar, xüsusilə qarğalar, ağcaqanad dişləməsi ilə yayılan virusun təbii rezervuarı hesab olunur.
Qərbi Nil virusu əsasən “Culex” cinsinə aid ağcaqanadların dişləməsi ilə insanlara keçir.
Virusa qarşı peyvənd olmadığı üçün ağcaqanad dişləmələrindən qorunmaq tövsiyə edilir.
Ağcaqanad dişləməsindən sonra inkubasiya dövrünün 2-14 gün arasında dəyişdiyi bildirilir. İmmuniteti zəif olan şəxslərdə bu müddətin 21 günə qədər uzana bildiyi qeyd olunur.
Virusun keçdiyi insanların təxminən 80 faizində heç bir simptom müşahidə olunmur.
Xəstələrin təxminən 20 faizində isə qızdırma, halsızlıq, ürəkbulanma və qusma, baş və əzələ ağrıları yarana bilər.
Əvvəlcə yalnız Afrikada müşahidə olunan Qərbi Nil virusu sonradan Fransa, İtaliya, İspaniya və Portuqaliya başda olmaqla bir sıra Avropa ölkələrinə yayılıb.
