Yunanıstanda Qərbi Nil virusuna yoluxma halları və virus səbəbindən ölüm hallarının sayı artıb.
“Operativ Məlumat Mərkəzi – OMM” xəbər verir ki, Yunanıstanın Milli İctimai Sağlamlıq Təşkilatının (EODY) son hesabatına əsasən, avqustun 19-dan 26-dək ölkə üzrə 75 yeni yoluxma halı qeydə alınıb.
Bildirilib ki, il ərzində Qərbi Nil virusu səbəbindən ölənlərin ümumi sayı son bir həftədə qeydə alınan 6 yeni ölüm hadisəsi ilə 19-a yüksəlib.
Avropa Xəstəliklərin Qarşısının Alınması və Nəzarəti Mərkəzinin (ECDC) məlumatlarına görə, Yunanıstan İtaliyadan sonra Qərbi Nil virusunun ən çox yayıldığı ikinci Avropa ölkəsidir.
Mütəxəssislər virusun yayılmasına ölkənin coğrafi mövqeyi və iqlim şəraitinin təsir etdiyini bildirirlər. Mülayim hava şəraiti virusu daşıyan ağcaqanadların daha uzun müddət aktiv qalmasına imkan verir.
Bəzi bələdiyyələrdə ağcaqanadlara qarşı mübarizə tədbirlərinin kifayət qədər effektiv həyata keçirilməməsi də epidemioloji vəziyyəti çətinləşdirən amillərdən biri kimi göstərilir.
