OMM Redaksiyası
Səudiyyə Ərəbistanının 1 200 kilometr uzunluğundakı Şərq-Qərb neft kəməri – “Petroline” üç nasos stansiyasına hücum nəticəsində fəaliyyətini dayandırıb. Hücumlar Ər-Riyad və Mədinə bölgələrində baş verib.
Gündə təxminən 7 milyon barel neft nəql etmək gücünə malik kəmərin təmirinin 5-6 həftə çəkə biləcəyi bildirilir. Bu müddətdə krallıq Omanın Sohar limanı yaxınlığında gəmidən-gəmiyə neft transferlərindən və nefti körfəz terminallarından dənizdəki məntəqələrə yönəldən daha iri tankerlərdən istifadə edir.
Bu plan bəzi yüklərin Hörmüz boğazından keçməsinə ehtiyacı azaltsa da, mürəkkəb logistika əlavə xərclərə və gecikmələrə səbəb olur. Səudiyyə şirkətləri Asiya bazarlarına neft daşımalarını yenidən nəzərdən keçirməyə məcbur qalıb.
Yəməndəki husilər isə Səudiyyənin enerji infrastrukturu və Qırmızı dənizdəki gəmiçilik marşrutlarına qarşı kampaniyanı gücləndirib. Qrup son açıqlamasında Bab əl-Məndəb boğazına yaxınlaşan ABŞ bayraqlı gəmilərə qarşı “naviqasiya azadlığını həyata keçirəcəyini” bildirib.
Xəbərdarlıq Vaşinqtonun Səudiyyə Ərəbistanına 48 ədəd “F-35 Lightning II” qırıcısının və əlaqəli avadanlıqların mümkün satışına 24,3 milyard dollar dəyərində razılıq verməsi ilə eyni vaxta təsadüf edib. Bu qərar Ər-Riyadın husilərin mümkün hücumlarına qarşı hava hücumundan müdafiəsini gücləndirmək niyyətini göstərir.
Boru kəmərinin fəaliyyətinin dayanması və Qırmızı dəniz marşrutuna təzyiq neft daşımalarının Misirin Süveyş kanalından və ya İraq limanlarından keçirilməsini gündəmə gətirib. Lakin bu variantlar daha uzun tranzit müddəti, yüksək sığorta xərcləri və silahlı hücum riskinin artması ilə müşayiət olunur.
Qlobal bazarlarda da qeyri-müəyyənlik artıb. Brent markalı neftin qiyməti sentyabrın sonlarında bir barel üçün 90 dollardan yuxarı qalxıb, “Dubai Takaful” qiyməti isə iyunun ortalarından bəri ilk dəfə təxminən 88 dollara yüksəlib.
Səudiyyə rəsmiləri kəmərə hücumların İrandan dəstək alan silahlı qruplar tərəfindən İraq ərazisindən həyata keçirildiyini bildiriblər. Onların sözlərinə görə, bu hücumlar Yəmən mərkəzli husilərin əməliyyatlarından ayrıdır. Buna baxmayaraq, hər iki hadisənin strateji məqsədi eynidir: Səudiyyə neftinin beynəlxalq alıcılara çatdırılmasına mane olmaq.
