OMM Redaksiyası
“Neftçi”nin yarımmüdafiəçisi Sessi Dalmeyda Lionel Messinin vida oyununda iştirakını karyerasının tarixi anlarından biri kimi dəyərləndirib. O, müsahibəsində Azərbaycan Premyer Liqasının 10-cu turunda “Şamaxı” üzərində qazanılan 3:2 hesablı qələbə barədə də danışıb.
“Şamaxı” ilə oyun
Dalmeydanın sözlərinə görə, qarşılaşma maraqlı keçib. O, “Şamaxı”nın güclü futbolçuları olan yaxşı komanda olduğunu və süni qazonda oynamağın çətinliyini vurğulayıb. “Neftçi”nin kollektiv şəkildə yaxşı çıxış etdiyini və sonda qələbə qazandığını bildirib.
Yarımmüdafiəçi komandasının matça yaxşı başlayaraq hesabı açdığını, lakin sonradan oyunun istədikləri kimi getmədiyini deyib. Rəqibin də yaxşı mübarizə apardığını qeyd edən Dalmeyda üçün əsas məqamın qələbə olduğunu söyləyib.
O, üç xalın vacibliyini vurğulayaraq “Neftçi”nin artıq turnir cədvəlinin ilk pilləsində olduğunu bildirib. Bununla belə, bunun son olmadığını və qarşıdakı oyunlara köklənməli olduqlarını deyib.
Dalmeyda qış çempionluğu üçün çalışacaqlarını, lakin tələsmədən hər dəfə növbəti matçı düşünəcəklərini qeyd edib. Komandanı “Kəpəz”lə oyun gözləyir və futbolçu həmin görüşdə qalib gələrək azarkeşləri sevindirmək istədiklərini bildirib.
Messinin vida oyunu
Benin millisinin heyətində Lionel Messinin vida oyununda meydana çıxan Dalmeyda həmin görüşü “tarixi an” adlandırıb. O, kapitan kimi argentinalı ulduza hədiyyə təqdim etdiyini və bu tarixin bir parçası olmaqdan məmnun qaldığını söyləyib.
“Messi həqiqətən də dünya futbolunun əfsanəsidir. Çox şadam ki, həmin görüşdə iştirak etmək mənə də qismət oldu. Möhtəşəm hisslər yaşadım”, – Dalmeyda deyib.
