OMM Redaksiyası
Qərbi Avropada iyun və iyul aylarında orta temperatur mövsümi normadan 2,79 dərəcə yüksək olaraq 21,62 dərəcəyə çatıb.
"Operativ Məlumat Mərkəzi-OMM" xəbər verir ki, bununla bağlı Avropa İttifaqının iqlim monitorinq xidməti “Kopernik” məlumat yayıb.
Bildirilib ki, iyul ayı qlobal miqyasda qütblərdən kənarda yerləşən okeanlar üçün tarixdə ən isti ay kimi qeydə alınıb.
Atlantik okeanı və Qərbi Aralıq dənizi boyunca qeydə alınan rekord temperatur göstəricilərinin Sakit okeanda inkişaf edən El-Ninyo hava hadisəsinin təsiri ilə dəniz ekosistemlərinə və sahilyanı yaşayış məntəqələrinə mənfi təsir göstərdiyi qeyd olunub.
İsti hava dalğalarının təsirinə məruz qalan Avropada yüksək temperaturla əlaqəli səbəblərdən 25 mindən çox insanın həyatını itirdiyi bildirilib.
Köhnəlmiş infrastruktur və kondisionerlərdən istifadənin yetərli olmaması isə istilərlə mübarizəni çətinləşdirib.
Fransa, İspaniya, Almaniya və Böyük Britaniyanın bəzi bölgələrində yağıntı və torpağın rütubət səviyyəsində rekord azalma qeydə alınıb.
Rekord temperatur qitənin müxtəlif bölgələrində meşə yanğınlarının genişlənməsinə səbəb olub. İspaniya, Fransa və İtaliyada baş verən yanğınlar nəticəsində 1,23 milyon akrdan çox ərazi yanıb, yüz minlərlə insan yaşayış yerlərini tərk etmək məcburiyyətində qalıb.
Vurğulanıb ki, quraqlıq səbəbindən Sena, Reyn və Dunay çaylarında suyun səviyyəsi aşağı düşüb.
Dunay çayında suyun həddindən artıq azalması nəticəsində Macarıstan və Rumıniyada çaydan soyutma suyu alan nüvə reaktorlarında enerji istehsalı müvəqqəti olaraq dayandırılıb.
