OMM Redaksiyası
İran Fransanın supermarketlərdə soyuducu sistemlərinə qarşı kiberhücumlar həyata keçirməsi ilə bağlı ittihamlarını rədd edib. Xarici işlər naziri Abbas Əraqçi Parisin ölkədəki problemlərə görə Tehranın üzərinə məsuliyyət qoyduğunu deyib. AnewZ-nin məlumatına görə, Əraqçi bu fikirləri noyabrın 10-da “X” platformasında paylaşımında yazıb.
Əraqçi Fransa hökumətini soyuducu sistemlərini idarə edə bilməməkdə və ictimai narazılığı başqa istiqamətə yönəltməyə çalışmaqda ittiham edib. O, İranın güclü olduğunu, lakin Fransadan fərqli olaraq Qəzzada qətllərə, məktəb və xəstəxanaların bombalanmasına dəstək verməklə güc tətbiq etmədiyini bildirib.
İran Xarici İşlər Nazirliyi də çərşənbə axşamı ittihamları rədd edərək onları əsassız və qərəzli adlandırıb. Nazirlik Fransanın idarəçilik və ictimai xidmətlərdəki nöqsanlarını xarici qüvvələri günahlandırmaqla ört-basdır etməyə çalışdığını iddia edib.
Fransa hökumətinin noyabrın 9-da yaydığı bəyanata görə, oktyabrın 11-i və 12-də ölkədə 700-dən çox pərakəndə satış məntəqəsində soyuducu avadanlıqların işinə mane olan kiberhücumlar baş verib və ərzaq məhsulları məhv olub. Fransa Xarici İşlər Nazirliyi araşdırmanın hücumları İranla əlaqəli kiberəməliyyatla bağladığını bildirib.
Paris əməliyyatı Fransanın maraq və suverenliyinin ciddi şəkildə pozulması kimi qiymətləndirib. Fransa İranın səfirini çağırıb və hücumlarda iştirak etdiyi iddia olunan şəxslər və qurumlara qarşı Avropa sanksiyalarının tətbiqinə çalışacağını açıqlayıb.
Fransanın xarici işlər naziri Jan-Noel Barro noyabrın 10-da Parisdə “G7” ölkələrinin xarici işlər nazirlərinin görüşündən sonra ölkəsinin təxminən 700 supermarketə qarşı kiberhücumun məsul şəxslərini müəyyənləşdirdiyini və cavab tədbirləri görəcəyini deyib. Fransa hökuməti əlavə tədbirlərin də görülə biləcəyini xəbərdar edib.
