OMM Redaksiyası
Fransada cümə axşamı ümummilli tətillər və etirazlar keçiriləcək. Yüz minlərlə insanın küçələrə çıxacağı gözlənilən aksiyalar Prezident Emmanuel Makron üzərində təzyiqi artırır. AnewZ-nin məlumatına görə, hakimiyyət oktyabr ayında baş verən zorakılıqların təkrarlanmaması üçün tədbirlər görür.
Solçu CGT həmkarlar ittifaqı da daxil olmaqla bir sıra təşkilatlar ümummilli nümayişlərə çağırıb, tələbə qrupları da aksiyalara dəstək verib. Etirazlar yaşayış xərclərinin artması, ictimai xidmətlər və təhsil sahəsindəki problemlərlə bağlı həftələrdir davam edən narazılıq fonunda keçirilir. Bu narazılıqlar son illərdə Fransada baş vermiş ən ciddi iğtişaşlardan bəzilərinə səbəb olub.
Hökumət oktyabrın 17-də baş verən qarışıqlıq və talanlardan sonra gərginliyi azaltmağa çalışır. Həmin vaxt təhlükəsizlik qüvvələri hadisələrə hazırlıqsız yaxalanıb, ölkənin müxtəlif bölgələrində mağazalara və ictimai binalara ziyan dəyib. Makronun reaksiyası tənqid olunub.
Hökumət sözçüsü Maud Bregeon çərşənbə günü Nazirlər Kabinetinin iclasından sonra “Oktyabrın 17-də baş verənləri təkrar yaşamaq qətiyyən yolverilməzdir, buna görə də son dərəcə ayıq-sayıqıq” deyib.
Etirazlar zamanı 70 min polis xidmət aparacaq
“BFM TV”nin məlumatına görə, ölkə üzrə təxminən 70 min polis əməkdaşının xidmətə cəlb olunması gözlənilir. Fransanın daxili kəşfiyyat xidməti Parisdən kənarda keçiriləcək etirazlarda 500 mindən 700 minədək insanın iştirak edə biləcəyini təxmin edir.
Təhsil Nazirliyinin bildirdiyinə görə, dövlət ibtidai məktəblərində çalışan müəllimlərin 17,5 faizi tətilə qoşula bilər. Həmkarlar ittifaqları dəmir yolu xidmətləri və ictimai nəqliyyatda mümkün fasilələr barədə xəbərdarlıq ediblər.
Məktəblərdə vəziyyətin pisləşdiyini və gələcəklə bağlı qeyri-müəyyənliyi əsas gətirən tələbələrin də aksiyalara qatılacağı gözlənilir. Parisdə yaşayan 19 yaşlı tələbə İrma de Banvil deyib: “Mümkün qədər çox insanı səfərbər etməyə çalışırıq. Bəzi insanlar qorxduqları üçün bunu etmir. Çoxları polis zorakılığından qorxur”.
Fransa hökuməti əvvəlki nümayişlərdə polisin davranışını müdafiə edib, lakin qanunsuz davranışla bağlı istənilən iddianın araşdırılacağını bildirib. Makron çərşənbə günü müdafiə və təhlükəsizlik iclası keçirib, hakimiyyət isə yeni ümummilli nümayişlərə hazırlaşır.
Tələbə etirazları daha geniş hərəkata çevrilib
Məktəblərdə şəraitin pisləşməsi və gələcək imkanlarla bağlı narahatlıq səbəbindən tələbələrin başladığı etirazlar sonradan hökumətə qarşı daha geniş hərəkata çevrilib.
Makrona yaxın bir rəsmi deyib: “Növbəti həftələrdə məqsəd daşan çayı yenidən məcrasına qaytarmaq və prezident seçkilərinə mümkün qədər sakit şəraitdə start verməkdir”. Rəsmi bu həftə mühasirəyə alınan liseylərin sayının iğtişaşların əvvəlki mərhələləri ilə müqayisədə azaldığını da bildirib.
Ötən şənbə keçirilən ümummilli nümayişlər əsasən dinc keçib, lakin aksiyaların kənarında bəzi toqquşmalar baş verib.
Prezident seçkilərinə beş ay qalmış siyasi gərginlik yüksək olaraq qalır. Namizədlər seçkiyə hazırlaşarkən müxalifət partiyaları həyat səviyyəsi və hökumətin siyasəti ilə bağlı narazılıqdan yararlanmağa çalışır.
Dövlətə məxsus elektrik şirkəti “EDF”nin məlumatına görə, Fransanın enerji sektorunda çalışan işçilər də cümə axşamı tətilə qoşulacaq. Bu addım enerji təchizatında mümkün fasilələrlə bağlı narahatlıq yaradıb.
Enerji sektoru işçilərinin sentyabrın ortalarında keçirdiyi əvvəlki tətil Fransada elektrik enerjisi təchizatını azaldıb, ölkənin ən böyük mayeləşdirilmiş təbii qaz terminalı olan Dunkirk LNG-də tədarük gücünü məhdudlaşdırmışdı.
