OMM Redaksiyası
“Qarabağ”ın sabiq yarımmüdafiəçisi Leandro Andrade üçillik fasilədən sonra Kabo-Verde millisinə çağırılıb. 27 yaşlı futbolçu Afrika Millətlər Kuboku-2027-nin seçmə mərhələsində Liberiyaya qarşı keçiriləcək iki oyunda yığmanın heyətində yer alacaq.
Andrade sonuncu dəfə 2023-cü ilin noyabrında, “Qarabağ”da çıxış etdiyi vaxt milli komandada oynayıb. O, Kabo-Verde yığmasının heyətində indiyədək yeddi matç keçirib.
Yarımmüdafiəçi cari mövsümdə “Polissya”nın heyətində bütün turnirlər üzrə 12 qarşılaşmada iştirak edib. Bu oyunlarda üç qol vurub və eyni sayda məhsuldar ötürmə verib.
Kabo-Verde seçmə mərhələyə uğursuz başlayıb: komanda ilk iki görüşündə Mali yığmasına 1:3, Ruanda yığmasına isə 1:2 hesabı ilə uduzub.
Andrade 2026-cı ilin yayında “Qarabağ”dan “Polissya”ya keçib. Ağdam klubunda çıxış etdiyi müddətdə dörd dəfə Azərbaycan çempionu olub və iki dəfə ölkə kubokunu qazanıb.
