Afət Ziyadqızı
Tayvan Müdafiə Nazirliyi rəsmi sosial şəbəkə hesabında paylaşım edərək son 24 saat ərzində adanın ətrafında Çinə məxsus hərbi hava vasitələrinin 21 uçuş həyata keçirdiyini açıqlayıb. Uçuşlarda bombardmançı və dəstək təyyarələri, qırıcılar, eləcə də hərbi helikopterlər iştirak edib.
“Operativ Məlumat Mərkəzi-OMM” xəbər verir ki, nazirliyin açıqlamasında hərbi təyyarələrdən 19-nun Tayvan boğazında tərəflərin təsir dairələrini ayıran orta xətti keçdiyi bildirilib. Uçuşlar adanın “Hava Hücumundan Müdafiə Tanınma Zonası” elan etdiyi ərazinin şimal, mərkəz, cənub-qərb və şərq hissələrində qeydə alınıb.
Məlumata əsasən, ada ətrafında Çinə məxsus 8 hərbi gəmi və 8 rəsmi gəminin də hərəkəti müşahidə olunub. Tayvan ordusu vəziyyəti nəzarətdə saxlayaraq patrul təyyarələrini, hərbi gəmiləri və sahil raket sistemlərini hazır vəziyyətə gətirib.
Qeyd edək ki, Çin Tayvanı öz ərazisinin tərkib hissəsi hesab edir və son illərdə ada üzərində hərbi təzyiqlərini kəskin artırıb. 1949-cu ildən faktiki müstəqilliyə malik olan Tayvan isə öz növbəsində hərbi xərclərini artırır və ABŞ-dən əldə etdiyi müasir silah sistemləri ilə müdafiə qabiliyyətini gücləndirməyə davam edir.
