OMM Redaksiyası
Gürcüstanın ən işlək dəniz limanı olan Poti ötürücülük gücünün son həddində fəaliyyət göstərir. Bu vəziyyət limanın genişləndirilməsi ilə bağlı uzun müddətdir müzakirə olunan layihənin reallaşdırılmasını daha da aktuallaşdırıb.
Poti Dəniz Limanı Administrasiyasının rəhbəri Zviad Çxartivilinin sözlərinə görə, Poti Limanının Genişləndirilməsi Layihəsi özəl maliyyə hesabına həyata keçiriləcək, dövlət isə tərəfdaş qismində çıxış edəcək. Bu mexanizm layihənin vergi ödəyicilərinin vəsaiti hesabına maliyyələşdirilməyəcəyini nəzərdə tutur.
Çxartivilinin bildirdiyinə görə, limanda yük həcmlərinin nisbətən aşağı, əməliyyat xərclərinin isə yüksək olması tariflərə təzyiq yaradır. Ötürücülük imkanlarının artırılması və xərclərin azaldılması tarif siyasətinin yaxşılaşdırılmasına, Poti limanının daha rəqabətqabiliyyətli olmasına şərait yarada bilər.
Poti limanı regionda artan rəqabətlə üzləşir. Aktau, Türkmənbaşı və Bakı limanlarına son illərdə yatırılan əhəmiyyətli investisiyalar onların Asiya ilə Avropanı Mərkəzi Asiya və Cənubi Qafqaz üzərindən birləşdirən Orta Dəhlizdə mövqelərini gücləndirib.
Çxartivilinin fikrincə, Gürcüstan Xəzər dənizi hövzəsindəki qonşuları ilə ayaqlaşmaq üçün “adekvat infrastruktur cavabı” verməlidir. O qeyd edib ki, yalnız Poti limanının genişləndirilməsi kifayət etməyəcək.
Layihə ilə paralel olaraq Şərq-Qərb avtomobil yolunun inkişafı, dəmir yolu şəbəkəsinin modernləşdirilməsi və gömrük prosedurlarının rəqəmsallaşdırılması da davam etməlidir. Bu layihələr Gürcüstanın Orta Dəhlizdə əsas əlaqələndirici həlqəyə, yaxud marşrut üzrə dar boğaza çevrilib-çevrilməyəcəyini müəyyən edə bilər.
Limanı idarə edən “APM Terminals” artan yük həcmlərini qarşılamaq üçün artıq əlavə tədbirlər görür. Limanın yaxınlığında gələcək inkişafı dəstəkləmək məqsədilə əlavə torpaq sahəsi alınıb. Yeni kranın isə ötürücülük imkanlarını 50 min TEU artıracağı gözlənilir.
Çxartivilinin gözləntisinə görə, görülən işlər ilin sonunadək limanın ümumi ötürücülük gücünü 650 min TEU-ya çatdıracaq. Bu əlavə imkanların həm Poti limanına, həm də bütövlükdə Orta Dəhlizə dəstək verəcəyi bildirilir.
Poti Dəniz Limanı Administrasiyası ilə Gürcüstanın İqtisadiyyat və Davamlı İnkişaf Nazirliyi arasında danışıqlar davam edir. Tərəflərin genişmiqyaslı layihənin detallarını yekunlaşdırmaq üçün ilin sonunadək əlavə görüşlər keçirməsi gözlənilir.
