Afət Ziyadqızı
İranın Nüvə Silahlarının Yayılmaması haqqında Müqavilədən (NPT) çıxması məsələsi Rusiya Federasiyasının Prezidenti Vladimir Putin ilə İran İslam Respublikasının Prezidenti Məsud Pezeşkian arasında keçiriləcək görüşün gündəliyinə daxil edilə bilər. Bu barədə Kremlin rəsmi nümayəndəsi Dmitri Peskov “RİA Novosti” agentliyinə verdiyi açıqlamada bildirib.
"Operativ Məlumat Mərkəzi-OMM" xəbər verir ki, Peskov iki ölkə liderinin gözlənilən görüşündə Tehranın NPT-dən çıxmaq niyyətinin müzakirə olunub-olunmayacağı ilə bağlı sualı cavablandırarkən, məsələnin İran tərəfinin təşəbbüsündən asılı olduğunu qeyd edib.
Kremlin sözçüsü vurğulayıb ki, əgər İran tərəfi bu barədə rusiyalı tərəfdaşlarını məlumatlandırmağı zəruri hesab edərsə və müvafiq planlar icra müstəvisinə keçərsə, mövzu ali səviyyəli danışıqlarda ətraflı nəzərdən keçirilə bilər.
Xatırladaq ki, Rusiya və İran Prezidentləri bundan əvvəl telefon danışığı aparıblar. Söhbət əsnasında tərəflər Moskva və Tehran arasında ikitərəfli strateji tərəfdaşlığın daha da dərinləşdirilməsi və regional təhlükəsizlik məsələlərində koordinasiyalı fəaliyyətin davam etdirilməsinin vacibliyini ifadə ediblər.
