Ermənistan orbitə ən azı üç peyk - Yeri müşahidə etmək üçün iki və bir telekommunikasiya peyki buraxmaq niyyətindədir.
“Operativ Məlumat Mərkəzi-OMM” Ermənistan mətbuatına istinadən xəbər verir ki, bu barədə ölkənin Baş naziri Nikol Paşinyan Parisdə keçirilən Beynəlxalq Kosmik Sammitdə çıxışı zamanı bildirib.
Onun sözlərinə görə, Ermənistan həmçinin yerüstü infrastrukturu və peyklərin idarə edilməsi, məlumatların qəbulu, emalı və təhlili üçün daxili imkanlarını inkişaf etdirmək niyyətindədir.
Bundan başqa, milli ehtiyacları, beynəlxalq kosmik missiyaları, həmçinin peyk məlumatlarına və xidmətlərinə artan tələbatı dəstəkləyə biləcək paylanmış yerüstü stansiyalar şəbəkəsinin yaradılması planlaşdırılır.
Paşinyan qeyd edib ki, Ermənistan hökumətinin 2026–2031-ci illəri əhatə edən proqramında milli kosmik imkanların inkişafı ayrıca strateji məqsəd kimi müəyyən edilib.
O, həmçinin kosmik sahə ilə süni intellekt arasında artan əlaqəni qeyd edib.
"Bu kontekstdə daha geniş milli "Süni intellekt fabrikləri parkı" konsepsiyasını hazırlayırıq. Onun məqsədi müxtəlif sahələrdə tədqiqatları, innovasiyaları və texnoloji inkişafı dəstəkləmək üçün qabaqcıl hesablama və süni intellekt imkanları ekosistemini yaratmaqdır", - o bildirib.
