OMM Redaksiyası
Ermənistanın baş naziri Nikol Paşinyan ölkəsinin 2029-cu ilədək Avropa İttifaqı (Aİ) ilə vizasız gediş-gəliş imkanına ümid etdiyini bildirib. AnewZ-in Armenpress-ə istinadən verdiyi məlumata görə, Paşinyan bu barədə İrəvanda erməni gənclər təşkilatı “Restart Foundation”ın keçirdiyi panel müzakirəsində danışıb.
Baş nazir gənclərə ölkəni beynəlxalq səviyyədə tanınmış sərhədləri və viza liberallaşdırılması ilə təhvil vermək istədiyini deyib.
“Ermənistan Respublikası beynəlxalq səviyyədə tanınmış ərazisi və açıq sərhədləri ilə — məcazi mənada, ölkəni gənclərə təhvil verməli olduğum vəziyyət budur”, — Paşinyan bildirib.
O əlavə edib ki, Aİ ilə münasibətlərin dərinləşdiyi indiki mərhələdə 2029-cu ilədək İttifaqla viza liberallaşdırılması barədə qərarın əldə olunacağına ümid edir.
“Açıq sərhədləri olan dinc ölkə” gənclərin məqsəd və arzularına çatmasına mane olan bütün əngəlləri aradan qaldıracaq, — Paşinyan deyib.
Paşinyan noyabrın 3-də “Euronews”a Ermənistanın 2027 və ya 2028-ci ildə Aİ-yə üzvlük üçün rəsmi müraciət edə biləcəyini söyləyib və bu tarixləri “realist” adlandırıb. Avqustda isə Ermənistan parlamentində hökumətin yaxın gələcəkdə üzvlük üçün müraciət etmək niyyətində olduğunu bildirib.
Aİ Rusiyanın ticarət məhdudiyyətlərindən sonra Ermənistan iqtisadiyyatına dəstək məqsədilə bir sıra erməni məhsullarına tətbiq olunan idxal rüsumlarını iki il müddətinə dayandırmağa razılaşıb. Avropa rəsmiləri Rusiyanın tədbirlərinin İrəvanın Aİ ilə yaxınlaşmasına cavab olduğunu bildiriblər.
