Afət Ziyadqızı
Ermənistanın xarici işlər naziri Ararat Mirzoyan və Azərbaycanın xarici işlər naziri Ceyhun Bayramov ABŞ hökumətinin təşkilatçılığı ilə keçirilən “Sülh yolu ilə rifah: Transxəzər ticarət marşrutuna və TRIPP-ə investisiyalar” mövzusunda panel müzakirəsində iştirak ediblər.
“Operativ Məlumat Mərkəzi-OMM” xəbər verir ki, Nyu-Yorkda baş tutan tədbirdə ABŞ-nin sülh missiyaları üzrə xüsusi nümayəndəsi Stiv Uitkoff, Dövlət katibinin Avropa və Avrasiya məsələləri üzrə köməkçisi Brendan Hanrahan və region ölkələrinin xarici siyasət idarələrinin rəhbərləri birgə çıxış ediblər.
Tədbir çərçivəsində TRIPP (Trump Route for International Peace and Prosperity – “Beynəlxalq sülh və rifah naminə Tramp marşrutu”) layihəsinin perspektivləri və onun Transxəzər Beynəlxalq Nəqliyyat Marşrutu ilə inteqrasiyası imkanları nəzərdən keçirilib.
ABŞ-nin xüsusi nümayəndəsi Stiv Uitkoff bildirib ki, layihənin reallaşması qlobal logistikada "dar boğazları" aradan qaldıraraq Hörmüz boğazındakı məhdudiyyətlər fonunda yükdaşımaların müddətini 2,5–3 həftəyə qədər qısaltmaq potensialına malikdir. Müzakirələrdə Ermənistanın hazırda Transxəzər marşrutunda yer almadığı, tranzit yüklərin bu ölkədən yan keçdiyi xatırladılaraq, yeni təşəbbüsün regionda logistik dinamikanı dəyişə biləcəyi vurğulanıb.
