OMM Redaksiyası
Azərbaycan Güləş Federasiyasının prezidenti Mikayıl Cabbarov Qazaxıstanın paytaxtı Astanada keçirilən dünya çempionatında və Seneqalın paytaxtı Dakarda təşkil olunan Yeniyetmələrin Yay Olimpiya Oyunlarında iştirak etmiş milli komandaların üzvləri, məşqçilər və federasiya rəsmiləri ilə görüşüb.
Görüşdə beynəlxalq yarışların nəticələri, Azərbaycan güləşinin dünya arenasındakı mövqeyi, idmanın inkişafı üçün görülən tədbirlər və qarşıdakı hədəflər ətrafında fikir mübadiləsi aparılıb. Prezident İlham Əliyevin idmana göstərdiyi diqqət və dövlət dəstəyi, həmçinin müasir idman infrastrukturunun yaradılmasının idmançıların beynəlxalq uğurları üçün yaratdığı imkanlar vurğulanıb.
Dünya çempionatında beşinci dəfə qızıl medal qazanan Eldəniz Əzizlinin Azərbaycan güləşi tarixində yeni nailiyyətə imza atması xüsusi qeyd olunub. Sənan Süleymanovun isə 15 illik fasilədən sonra Olimpiya çəkisində dünya çempionu titulunu ölkəyə qazandırdığı bildirilib.
Yeniyetmələrin Yay Olimpiya Oyunlarında oğlanlardan ibarət Azərbaycan millisinin 2 qızıl və 1 gümüş medal qazanaraq komanda hesabında birinci yeri tutması da müzakirə edilib. Cabbarov idmançıları, məşqçiləri və federasiya nümayəndələrini nəticələr münasibətilə təbrik edib. Qarşıdakı dövrdə hazırlığın gücləndirilməsi, idmançıların rəqabət qabiliyyətinin artırılması və iki ildən sonra keçiriləcək Yay Olimpiya Oyunlarına sistemli hazırlaşmağın vacibliyi diqqətə çatdırılıb. Görüşdə Azərbaycan güləşinin beynəlxalq nüfuzunun yüksəldilməsi və uğurların davamlılığının təmin edilməsi üçün tədbirlər də qeyd olunub.
