Məsud Pezeşkian və Nikol Paşinyan ikitərəfli əlaqələri müzakirə ediblər

İran İslam Respublikasının Prezidenti Məsud Pezeşkian İrəvanda keçirilən BMT-nin Bioloji Müxtəliflik haqqında Konvensiyasının Tərəflər Konfransının 17-ci sessiyası (COP17) çərçivəsində Ermənistanın Baş naziri Nikol Paşinyan ilə ikitərəfli görüş keçirib.

"Operativ Məlumat Mərkəzi-OMM" xəbər verir ki, İranın rəsmi IRNA agentliyinin Tehrandan verdiyi məlumata görə, danışıqlar zamanı iki qonşu ölkə arasında ikitərəfli münasibətlərin mövcud vəziyyəti, müxtəlif sahələrdə əməkdaşlığın genişləndirilməsi perspektivləri və regional təhlükəsizlik məsələləri müzakirə olunub.

Tərəflər ikitərəfli iqtisadi-ticari əlaqələrin inkişafı, nəqliyyat və enerji layihələrinin icrası, eləcə də Cənubi Qafqazda sabitliyin təmin edilməsi istiqamətində qarşılıqlı təmasların davam etdirilməsinin vacibliyini vurğulayıblar.