Afət Ziyadqızı
Türkiyə Respublikasının müxtəlif bölgələrində, xüsusilə İstanbul və Antalya şəhərlərində müşahidə olunan aramsız leysan yağışları ciddi təbii fəlakətə və daşqınlara səbəb olub.
"Operativ Məlumat Mərkəzi-OMM" xəbər verir ki, Antalya yerli hakimiyyət orqanlarının yaydığı rəsmi məlumata əsasən, bölgədə son 80 ildən artıq dövrdə bu intensivlikdə rekord həcmdə yağıntı qeydə alınmayıb. Türkiyə mətbuatının yaydığı görüntülərdə Antalyada su altında qalmış dəbdəbəli mehmanxanalardan birində pianoçunun “Titanik” filmindən məşhur musiqini ifa etməsi sosial şəbəkələrdə geniş rezonans doğurub.
Meqapolis İstanbulda oktyabrın 13-ü axşam saatlarından başlayan leysan yağışları nəticəsində şəhər ərazisinə 139–269 millimetr aralığında yağıntı düşüb.
Aram kəsməyən yağışlar səbəbindən şəhər rəsmiləri 1 300-dən çox yaşayış və obyekt sahəsinin su basması, eləcə də 15 fərqli ərazidə torpaq sürüşməsi faktını qeydə alıblar. Təbii fəlakət zonasından 2 mindən çox sakin təhlükəsiz yerlərə təxliyə olunub.
İstanbulda rekord həddə çatan yağıntıların törətdiyi fəsadlar və su daşqınları nəticəsində həyatını itirənlərin sayı 4 nəfərə çatıb. Fövqəladə hallar və xilasetmə xidmətləri ərazidə bərpa və təxliyə işlərini fasiləsiz davam etdirir.
