OMM Redaksiyası
Həftənin əsas futbol xəbərləri və transfer söz-söhbətləri arasında Lionel Messinin “Barselona” forması ilə meydana çıxmaq ehtimalı, Kilian Mbappenin “Qızıl top” uğrunda fəallığı və Vinisius Juniorun “Real”dakı mövqeyi ilə bağlı narahatlıq diqqət çəkib.
Messi “Barselona” formasında meydana çıxa bilər
“Barselona”nın prezidenti Joan Laporta Lionel Messi üçün klubda xüsusi vida mərasimi keçirməyi planlaşdırır. Argentinalı futbolçunun 2021-ci ildə komandadan ayrılması maliyyə problemləri səbəbindən baş tutmuş və onunla vidalaşma gözlənilən səviyyədə alınmamışdı.
İddialara görə, Messi 2028-ci ildə keçirilə biləcək Joan Qamper Kubokunda “Barselona”nın heyətində çıxış edə bilər. Həmin qarşılaşmada kataloniyalıların “İnter Mayami” ilə üz-üzə gələcəyi və argentinalı hücumçunun hər iki komandada bir hissə oynaması planlaşdırılır. Bu ideyanı “İnter Mayami”nin əsas investorlarından biri Devid Bekhem də dəstəkləyib.
“Barselona”da Flikin qərarından narazılıq
Klub daxilində Hans-Diter Flikin gənc hücumçu Həmzə Abdelkərimə rəsmi matçlarda kifayət qədər şans verməməsindən narazılıq olduğu bildirilir. Futbolçu mövsümöncəsi hazırlıqda yaxşı təsir bağışlasa da, əsas komandada az oynayır.
Flik isə hesab edir ki, Abdelkərim məşqlərdə və oyunu anlama baxımından hələ inkişaf etməlidir. Almaniyalı mütəxəssis gənc forvardın müntəzəm çıxış üçün hazır olmadığını düşünür.
Mbappe “Qızıl top” üçün kampaniyanı gücləndirib
Kilian Mbappenin “Qızıl top” səsverməsində şanslarını artırmaq üçün özünü tanıtma kampaniyasına başladığı iddia edilir. “Real”ın və Fransa millisinin hücumçusu son həftələrdə verdiyi müsahibələrdə bu mükafata layiq olduğunu vurğulayıb.
Fransalı futbolçunun Afrika auditoriyasına yönəlmiş müsahibə üçün RFI radiosuna özü müraciət etdiyi yazılıb. Mbappe həmin müsahibədə Afrika köklərini unutmadığını və “Qızıl top”u bu qitəyə həsr etmək istədiyini deyib. Məlumata görə, səsvermədə Afrika ölkələrindən olan jurnalistlərin payı təxminən 20 faizdir.
Mbappenin bu addımlarının “Real” rəhbərliyində birmənalı qarşılanmadığı da bildirilir. Klub daxilindəki anonim mənbə futbolçunun “Qızıl topu diləndiyini” söyləyib.
“Bavariya” Holannı transfer etmək istəyir
Erling Holannın mümkün transferi ilə bağlı “Real” və “Barselona”nın adı çəkilsə də, son məlumatlara əsasən, “Bavariya” da norveçli hücumçu uğrunda mübarizəyə qoşulub.
Münhen klubunun idman rəhbərliyində Holannın karyerasının son mərhələsinə yaxınlaşan Harri Keyni əvəz edə biləcəyinə inanırlar. “Bavariya”nın norveçlini iki və ya üç il sonra transfer etmək istədiyi iddia olunur.
“Real” Vinisiusdan narazıdır
“Real”da Vinisius Juniorun çıxışı ilə bağlı narahatlığın artdığı bildirilir. Braziliyalı futbolçu cari mövsümdə cəmi bir qol vurub.
Madrid klubunda Vinisiusun altı illik yeni müqavilə imzaladıqdan sonra əvvəlki motivasiyasını itirdiyi qənaəti yaranıb. Baş məşqçi Joze Mourinyonun braziliyalı hücumçunu əsas heyətdən kənarda saxlamaq variantını nəzərdən keçirdiyi də iddia edilir. Bu halda Vinisius start heyətində yerini qorumağa layiq olduğunu sübut etməli olacaq.
