Şəhriyar Məmmədyarov Macarıstanın paytaxtı Budapeştdə keçirilən “Total Chess World Championship Tour Pilot 2026” turnirində çıxışını başa vurub. Azərbaycan qrossmeysteri 15-16-cı yerlər uğrunda qarşılaşmada almaniyalı Vinsent Keymerə uduzaraq 24 iştirakçı arasında 16-cı olub.
İlk oyun günündə 5,5:14,5 hesabı ilə məğlub olan Məmmədyarov ikinci gündə rəqibi ilə heç-heçə edib. Şahmatçılar dörd blits partiyasında hərəyə bir qələbə qazanıb, iki görüşdə isə xalları bölüşüblər. Rapid partiyalarında da tərəflər hərəyə bir dəfə qalib gəlib.
Sürətləndirilmiş vaxt nəzarəti ilə keçirilən son klassik partiya 90 gedişdən sonra heç-heçə yekunlaşıb. İkinci günün hesabı 10:10 olub. İlk gündə üstünlük qazanan Keymer 15-ci yeri tutub.
Turnirin qalibi armageddonda bəlli oldu
Finalın ilk günündə niderlandlı Aniş Giriyə 9:11 hesabı ilə uduzan fransalı Əlirza Firuzca ikinci gündə 12:8 hesabı ilə qalib gəlib. Həlledici armageddon partiyasında da üstün olan Firuzca turnirin baş mükafatına sahib çıxıb.
Giri ikinci, ABŞ təmsilçisi Fabiano Karuana üçüncü, fransalı Maksim Vaşye-Laqrav dördüncü olub. Norveçli Maqnus Karlsen yarışı 17-ci pillədə tamamlayıb.
Kontekst
Noyabrın 19-da Məmmədyarov Keymerlə qarşılaşmanın ilk gününü 5,5:14,5 hesablı məğlubiyyətlə başa vurmuşdu.