“Sabah”ın müdafiəçisi Timoteuş Puxaç UEFA Çempionlar Liqasının əsas mərhələsində “Barselona” ilə keçiriləcək oyunda qələbə qazanmaq istədiyini bildirib.
Polşalı futbolçu Misli Premyer Liqasının 12-ci turunda “Sumqayıt”ı 5:1 hesabı ilə məğlub etdikləri matçdan sonra klubun sosial şəbəkə hesabında yayımlanan videomüsahibədə qarşıdakı görüş barədə danışıb.
“Bu barədə düşünmək belə çətindir. Dostlarım və ailə üzvlərimlə danışanda “Barselona”ya qarşı oynayacağımız hələ də mənə qeyri-real görünür. Sanki yuxudur. Düzünü desəm, görüşü səbirsizliklə gözləyirəm. Çünki nəticədə bu da adi bir futbol oyunudur. Bilirəm, bəlkə də çılğın səslənəcək, amma mən “Barselona”ya qalib gəlmək istəyirəm. Niyə də yox?”
“Sabah” noyabrın 20-də səfərdə “Sumqayıt”ı 5:1 hesabı ilə məğlub edib. Puxaç həmin görüşdə komandasının qollarından birini vurub. Bakı klubu noyabrın 25-də Çempionlar Liqasının əsas mərhələsində “Barselona”nı qəbul edəcək.
Kontekst
Xatırladaq ki, oktyabrın 23-də Puxaç “Barselona” ilə oyunda Lamin Yamala boş yer verməyəcəyini deyib. O, həmin vaxt noyabrın 25-də Bakıda keçiriləcək qarşılaşma barədə danışmışdı.