“Sumqayıt”ın baş məşqçisi Filipe Kandido Misli Premyer Liqasının 12-ci turunda “Sabah”a 1:5 hesablı məğlubiyyətdən sonra oyunu dəyərləndirib.
Portuqaliyalı mütəxəssis komandasının ilk 15 dəqiqədə yaxşı oynadığını, topa nəzarət etdiyini və qol imkanları yaratdığını bildirib. Onun sözlərinə görə, “Sabah”ın ardıcıl beş matçdır qələbə qazana bilməməsi rəqibin bu görüşə yüksək enerji və əzmlə çıxacağını göstərirdi. “Sumqayıt” rəqibin ilk zərbəsindən sonra qol buraxsa da, qırmızı vərəqəyə qədər yaxşı reaksiya verib.
Kandido iki səhvə diqqət çəkdi
Baş məşqçi fasilədə futbolçularına təslim olmamağı tapşırdığını, qol imkanı yaratmaq və ya rəqibin səhvindən yararlanmaqla vəziyyəti dəyişə biləcəklərini dediyini söyləyib. Bununla belə, “Sabah”ın keyfiyyətli oyunçularının yaxşı imkanlar qazandığını və matçın 1:5 hesabı ilə başa çatdığını vurğulayıb.
Kandido komandasının iki böyük səhv etdiyini bildirib: autdan topu rəqibə vermələri qol ilə nəticələnib, Lukas Blekin qırmızı vərəqə alması isə vəziyyəti çətinləşdirib. Mütəxəssis Blekin sarı vərəqəsi olduğunu unutmamalı və ehtiyatlı davranmalı olduğunu deyib. O, epizodun təkrarına baxmadığını, mövsümdə “Sumqayıt”ın ilk qırmızı vərəqəsinin məyusedici olduğunu qeyd edib.
Kandido stadiondakı atmosferi yüksək qiymətləndirib və azarkeşlərə yaxşı nəticə bəxş edə bilmədiklərinə görə təəssüfləndiyini bildirib.