OMM Redaksiyası
“Sumqayıt” Misli Premyer Liqasının VIII turunda “Araz-Naxçıvan”ı 2:1 hesabı ilə məğlub edib. Komandanın baş məşqçisi Filipe Kandido oyundan sonra keçirilən mətbuat konfransında qarşılaşmanı dəyərləndirib.
Portuqaliyalı mütəxəssis qələbəyə görə sevindiyini, futbolçuların və azarkeşlərin bu nəticəyə layiq olduğunu deyib. Onun sözlərinə görə, komanda matça istədikləri kimi başlamayıb və rəqibin dörd orta xətt oyunçusu ilə meydana çıxması onlar üçün gözlənilməz olub.
“İlk 10 dəqiqədə rəqibin qarşısını necə alacağımızı düşünürdük. “Araz-Naxçıvan”ın fərdi bacarıqları olan futbolçuları var. Sadə top itkisindən sonra rəqibə qol imkanı verdik”, – Kandido bildirib.
Məşqçi fasilədə müəyyən dəyişikliklər etdikdən sonra komandasının daha yaxşı oynamağa başladığını qeyd edib. O, “Sumqayıt”ın bəzi epizodlarda fərdi pressinq tətbiq etdiyini, bir neçə qol imkanı yaratdığını və sonda qələbə qazandığını söyləyib.
