Meksikada təhlükəsizlik qüvvələri 2026-cı il Dünya Çempionatına hazırlaşan Cənubi Koreya milli futbol komandasının məşq düşərgəsi yaxınlığında uçuş həyata keçirən naməlum pilotsuz uçuş aparatını (PUA) zərərsizləşdirib.
"Operativ Məlumat Mərkəzi-OMM" "Associated Press" (AP) agentliyinə istinadən xəbər verir ki, ərazidə icazəsiz uçuş həyata keçirən PUA aşkar edildikdən dərhal sonra tədbir görülüb.
İnsidentin komandaların qarşılaşacağı vacib matç ərəfəsində baş verməsi diqqət çəkir. Hazırda aparatın Cənubi Koreya yığmasını izləmək və ya taktiki məlumat toplamaq məqsədilə göndərilib-göndərilmədiyi araşdırılır.
Cənubi Koreyanın baş məşqçisi Honq Myunq-bo baş verənləri "təəssüfedici" adlandırıb:
"Məşq zamanı səmada PUA olduğunu fərq etdik. Xoşbəxtlikdən, bu, taktiki hazırlıqlarımıza başlamazdan əvvəl baş verdi, ona görə də işimizə ciddi təsir göstərmədi. Lakin hazırlıq prosesinin ən kritik mərhələsində belə bir hadisənin yaşanması xoşagəlməzdir".
Meksikalı rəsmilərin məlumatına görə, son günlərdə turnirin keçiriləcəyi Mexiko, Guadalajara və Monterrey şəhərlərindəki stadionların təhlükəsizlik zonalarına daxil olmağa cəhd edən çoxsaylı PUA-lar zərərsizləşdirilib.
