Afət Ziyadqızı
Türkiyənin Daxili İşlər Nazirliyi Manisanın Turgutlu rayonunda yerləşən İnci Üzmez Peşə və Texniki Anadolu Liseyinin yaxınlığında baş verən silahlı hücumla bağlı genişmiqyaslı araşdırma başladıb.
“Operativ Məlumat Mərkəzi-OMM” xəbər verir ki, bu barədə Türkiyə Daxili İşlər Nazirliyinin mətbuat xidməti rəsmi bəyanat yayıb.
Nazirliyin açıqlamasında bildirilib ki, hadisədən dərhal sonra Daxili İşlər Nazirliyi və dövlətin aidiyyəti bütün qurumları operativ şəkildə hərəkətə keçib. Təhlükəsizlik qüvvələri və məhkəmə orqanları insidentin bütün təfərrüatlarının aydınlaşdırılması, təqsirkar və ya təqsirkarların ədalət qarşısında cavab verməsi üçün kompleks istintaq tədbirlərini sürətlə davam etdirir.
Hadisənin bütün yönləri ilə hərtərəfli və obyektiv araşdırılması məqsədilə nazirlik tərəfindən 2 mülki idarə başmüfəttişi və 2 polis başmüfəttişi təyin edilərək dərhal Manisaya ezam olunub.
Daxili İşlər Nazirliyi bəyanatın sonunda hücum nəticəsində yaralanan və müxtəlif tibb müəssisələrində tedavisi davam edən şagirdlərə tezliklə sağalmalarını arzulayıb.
