"Macarıstan Rusiyaya qarşı iqtisadi sanksiyaların mümkün qədər tez aradan qaldırılmasının tərəfdarıdır və Avropa Komissiyasının Rusiyadan enerji nəqlini qadağan etmək planını dəstəkləmir".
"Operativ Məlumat Mərkəzi-OMM" xarici KİV-ə istinadən xəbər verir ki, bu sözləri Macarıstan hökumətinin başçısı Viktor Orban Avropa İttifaqı ölkələrinin parlament sədrlərinin Budapeştdə keçirilən konfransının iştirakçıları qarşısında çıxışı zamanı deyib.
"Təsəvvür edin ki, ev təsərrüfatları və şirkətlər üçün enerji qiymətləri sonda iki dəfə artacaq. Macarıstan ailələri buna dözə bilməyəcəklər", - baş nazir bildirib.
Orban qeyd edib ki, məhz buna görə Macarıstan Ukraynadakı münaqişənin tezliklə həllinin tərəfdarıdır. Onun sözlərinə görə, Macarlar sülh istəyir və onlar Brüsselin iqtisadi sanksiyalar siyasətindən tez bir zamanda xilas olmaq istəyirlər.
