Lixtenşteynin üç futbolçusu Azərbaycanla oyun öncəsi fərdi məşq edib

Lixtenşteyn millisi UEFA Millətlər Liqasında Azərbaycanla keçirəcəyi qarşılaşmaya hazırlığa başlayıb. Komandanın ilk məşqi noyabrın 10-da günortadan sonra Ruqqeldəki “Vidau” kompleksində təşkil olunub.

Bazar günü klublarının çempionat oyunlarında meydana çıxan üç futbolçu ümumi məşqə qatılmayıb. Onlar fiziki hazırlıq məşqçisinin rəhbərliyi ilə fərdi proqram üzrə çalışıblar. Qərar Azərbaycanla oyun ərəfəsində futbolçuların fiziki yükünü tənzimləmək məqsədilə verilib. Digər oyunçular komanda məşqində iştirak ediblər.

Lixtenşteyn yığması qarşılaşmaya kapitanı Nikolas Hasler olmadan hazırlaşır. “Vaduz”un 35 yaşlı futbolçusu “Sion”la matçda zədələndiyindən komandanın toplanışına qoşula bilməyib. Haslerin əvəzinə heyətə 27 yaşlı Manuel Mikus dəvət olunub.

Lixtenşteyn Azərbaycan millisini noyabrın 13-də Vaduzdakı “Reynpark” stadionunda qəbul edəcək. Matç Bakı vaxtı ilə saat 23:45-də başlayacaq.