OMM Redaksiyası
Kiyev meri Vitali Kliçkonun “Telegram” kanalında yaydığı məlumata görə, Rusiya PUA-sının şəhərdəki qaz stansiyasına zərbəsi nəticəsində iki nəfər həyatını itirib.
Hadisə zamanı daha dörd nəfər yaralanıb. Yaralıların hazırda xəstəxanada müalicə aldığı bildirilir.
Kiyev şəhər hakimiyyəti Rusiya hava zərbələri nəticəsində yaralıların sayının səkkizə yüksəldiyini açıqlayıb. Hücumlar zamanı doqquzmərtəbəli yaşayış binasında da yanğın baş verib.
Digər tərəfdən, Rusiyanın Saratov vilayətində “Ozon” şirkətinin logistika mərkəzinə PUA hücumu nəticəsində yanğın baş verib. Şirkət bölgədə yeni sifarişlərin qəbulunu və çatdırılmasını müvəqqəti dayandırıb.
Rusiyanın Perm vilayətində iki sənaye müəssisəsinin Ukrayna PUA-ları ilə vurulduğu açıqlanıb. Vilayətin qubernatoru Dmitri Maxonin hücum nəticəsində tələfat olmadığını bildirib.
Rusiya Müdafiə Nazirliyinin məlumatına görə, gecə ərzində ölkənin müxtəlif regionları, eləcə də Qara və Xəzər dənizləri üzərində 777 Ukrayna PUA-sı məhv edilib.
Ukrayna Prezidenti Volodimir Zelenski isə Kanada ilə imzalanan PUA razılaşması çərçivəsində istehsal olunacaq dronların 30 faizinin Ukraynaya veriləcəyini bildirib.
Avropa Komissiyası Rusiyanın dondurulmuş aktivlərindən Ukraynanın xeyrinə istifadə imkanlarını yenidən araşdırır. “Financial Times”ın məlumatına görə, Avropada Rusiyanın mərkəzi bankına məxsus 243 milyard dollar və ya 210 milyard avro dəyərində aktiv dondurulub.
