Afət Ziyadqızı
ABŞ Müdafiə Nazirliyinin (Pentaqon) rəhbərinin keçmiş müşaviri Duqlas Makqreqor Ukrayna-Rusiya müharibəsinin gedişatı ilə bağlı fikirlərini bölüşüb.
“Operativ Məlumat Mərkəzi-OMM” xəbər verir ki, Makqreqor "X" sosial şəbəkəsindəki paylaşımında Rusiyanın münaqişədə üstünlük qazandığını, həmçinin rəsmi Moskvanın Vaşinqtona qarşı əvvəlki loyal münasibətinin artıq qalmadığını iddia edib.
O bildirib ki, NATO-nun münaqişənin eskalasiyasını azaltmaq cəhdləri nəticəsiz qalıb və bu vəziyyət Ukrayna üçün ağır nəticələr doğurub.
Keçmiş müşavirin sözlərinə görə, hərbi heyətin tükənməsi və silah-sursat çatışmazlığı səbəbindən Ukrayna ciddi itkilərlə üzləşib və hazırda ağır vəziyyətdədir.
Makqreqor daha əvvəl də Avropa İttifaqının Rusiyaya qarşı sərt ritorikasını tənqid etdiyini xatırladaraq, Avropanın hərbi yollarla Moskvaya qarşı dura bilməyəcəyini iddia edib.
O, Avropa siyasətçilərini mövcud reallıqları obyektiv qiymətləndirməyə və imkanlarını olduğundan artıq qiymətləndirməməyə çağırıb.
