İran Xarici İşlər Nazirliyinin sözçüsü İsmail Bəqayi NATO Baş katibi Mark Ruttenin son açıqlamalarına münasibət bildirib.
"Operativ Məlumat Mərkəzi-OMM" xəbər verir ki, Bəqayi "X" sosial şəbəkə hesabında paylaşdığı açıqlamada Mark Ruttenin Avropanın münaqişədə iştirakı ilə bağlı fikirlərinin qitənin bu qarşıdurmada bitərəf olmadığını göstərdiyini iddia edib.
Məlumata görə, İran rəsmisi öz ərazilərini, hərbi bazalarını və infrastrukturunu təcavüzkar tərəfə açan dövlətlərin həyata keçirilən hərbi əməliyyatların və onların nəticələrinin məsuliyyətindən yayınmasının mümkün olmadığını bildirib.
Bildirilib ki, Bəqayi bu mövqenin Avropanın münaqişədə birbaşa iştirak etdiyini təsdiqlədiyini vurğulayıb.
Qeyd olunub ki, İran Xarici İşlər Nazirliyinin sözçüsü Mark Ruttenin açıqlamalarını "siyasi itaətkarlıq" kimi qiymətləndirib. O, NATO rəhbərinin mövqeyini güc nümayişi deyil, müəyyən dairələrə xidmət edən siyasət kimi xarakterizə edib.
Baqai bildirib ki, Vaşinqtonun gözündə səmərəsiz hesab edilən bir təşkilatın bu cür yanaşmalarla daha təsirli hala gətirilməsi mümkün deyil. Onun sözlərinə görə, bu tip ritorika NATO və onun rəhbərliyinin nüfuzuna mənfi təsir göstərir.
