Finlandiya Prezidenti Aleksandr Stubb Türkiyəyə səfəri çərçivəsində Ankara ilə münasibətlər və əməkdaşlıq barədə müsbət mesajlar verib.
“Operativ Məlumat Mərkəzi-OMM” xəbər verir ki, Stubb “X” sosial şəbəkəsindəki rəsmi hesabında Türkiyə Prezidenti Rəcəb Tayyib Ərdoğanla birgə fotosunu paylaşaraq iki ölkə arasındakı strateji tərəfdaşlığın əhəmiyyətini vurğulayıb.
Məlumata görə, Finlandiya lideri Türkiyənin ölkəsi üçün həm təhlükəsizlik, həm də iqtisadi sahələrdə mühüm tərəfdaş olduğunu bildirib. O, iki dövlətin əməkdaşlığının daha təhlükəsiz Avropanın formalaşmasına töhfə verdiyini qeyd edib.
Aleksandr Stubb, həmçinin Türkiyənin Ukraynadakı münaqişənin həlli istiqamətində həyata keçirdiyi diplomatik təşəbbüslərə diqqət çəkib. Onun sözlərinə görə, Ankaranın davamlı və ədalətli sülh üçün danışıqlara ev sahibliyi etməyə hazır olması mühüm addımdır.
