Rusiya Ankarada keçirilən 36-cı NATO Dövlət və Hökumət Başçıları Zirvəsində baş verən prosesləri diqqətlə izləyəcəyini açıqlayıb.
“Operativ Məlumat Mərkəzi-OMM” xəbər verir ki, bu barədə Rusiya Prezidentinin mətbuat katibi Dmitri Peskov “RİA Novosti” agentliyinə açıqlamasında bildirib.
Məlumata görə, Peskov NATO sammitinin Moskva üçün ciddi maraq doğurduğunu və tədbir çərçivəsində səsləndiriləcək bəyanatlar, qəbul olunacaq qərarlar və digər proseslərin diqqətlə təhlil ediləcəyini qeyd edib.
Kreml sözçüsü bildirib ki, sammitə hazırlıq dövründə Rusiya ilə bağlı çoxsaylı açıqlamalar verilib. Onun sözlərinə görə, Moskva bu bəyanatların əksəriyyətini qarşıdurma xarakterli hesab edir.
Qeyd edək ki, Ankara sammiti çərçivəsində Türkiyə Prezidenti Rəcəb Tayyib Ərdoğanla ABŞ Prezidenti Donald Tramp arasında görüşün keçirilməsi gözlənilir. Bildirilir ki, tərəflər arasında müzakirə olunacaq əsas məsələlərdən biri də Rusiya-Ukrayna müharibəsi və sülh danışıqlarının bərpası perspektivləri olacaq.
