Əfqanıstanın paytaxtı Kabul şəhərinin mərkəzi hissəsində güclü partlayış baş verib.
"Operativ Məlumat Mərkəzi-OMM" xarici KİV-ə istinadən xəbər verir ki, hadisə paytaxtın ticarət mərkəzləri, mağazalar və otellərin sıx yerləşdiyi Şəhr-e Nau rayonunda qeydə alınıb.
Sosial şəbəkələrdə paylaşılan görüntülərdə hadisə yerində böyük panikanın yaşandığı, insanların ərazidən qaçaraq uzaqlaşdığı və yerdə yaralıların olduğu görünür.
Hadisənin miqyası və dəqiq itkilər barədə məlumatlar dəqiqləşdirilir.
Əfqanıstan Daxili İşlər Nazirliyinin mətbuat katibi Əbdül Mətin Qani hadisə ilə bağlı bildirib ki, partlayış nəticəsində ölənlər və yaralılar var. Hadisənin başvermə səbəbi hələlik müəyyən edilməyib. Yaxın vaxtlarda ictimaiyyətə daha ətraflı məlumat təqdim olunacaq.
Hazırda hadisə yerinə təhlükəsizlik qüvvələri cəlb olunub və araşdırma aparılır.
