Afət Ziyadqızı
İtaliya İspaniyadan hava və dəniz yolu ilə gələn sərnişinlərə tətbiq olunan sərhəd nəzarətinin müddətini daha 15 gün uzadıb. Qərar İspaniyanın Şimali Afrikadakı Sebte şəhərində davam edən miqrasiya böhranı fonunda qəbul edilib.
"Operativ Məlumat Mərkəzi-OMM" xəbər verir ki, ANSA agentliyinin məlumatına görə, İtaliyanın daxili işlər naziri Matteo Piantedosi Miqrasiya və Sərhəd Təhlükəsizliyi Analiz Komitəsi ilə məsləhətləşmədən sonra nəzarət tədbirlərinin uzadılmasına qərar verib.
Qərarın Sebtedəki mövcud vəziyyətə və daha əvvəl müəyyən edilmiş kritik problemlərin davam etməsinə əsaslandığı bildirilib. Məlumat Avropa İttifaqı Komissiyasına və Aİ üzv ölkələrinə də göndərilib.
Mərakeşin Fnidek şəhəri sahillərindən İspaniyanın Sebte şəhərinə iyulun 30-u və 31-də təxminən 70 min qeyri-qanuni miqrantın üzüb keçdiyi açıqlanmışdı. İspaniya hökuməti qeyri-qanuni miqrasiya cəhdlərinin artmasından sonra təhlükəsizliyin təmin edilməsi üçün silahlı qüvvələri bölgəyə yerləşdirmək qərarına gəlib. Mərakeşdən İspaniyaya keçməyə çalışarkən həyatını itirən qeyri-qanuni miqrantların sayının 88 olduğu bildirilib.
Sebteyə miqrant axını səbəbindən İtaliya avqustun 1-dən etibarən İspaniya ilə sərbəst hərəkəti dayandırıb. İki ölkə arasında quru sərhədi olmadığı üçün Roma İspaniyadan dəniz və hava yolu ilə gələn sərnişinlərə sərhəd nəzarəti tətbiq etməyə başlayıb.
İtaliyanın qərarı İspaniyanın etirazına səbəb olub. Madrid də analoji müddət ərzində İtaliyadan İspaniyaya dəniz və hava yolu ilə gələn sərnişinlər üçün sərhəd yoxlamalarının tətbiq ediləcəyini açıqlayıb.
Roma sentyabrın 15-də nəzarət müddətini uzadıb. Bunun ardınca Madrid İtaliyadan gələn sərnişinlərin oktyabrın 8-dək sərhəd yoxlamasına cəlb ediləcəyini bildirib.
