OMM Redaksiyası
İsveçrənin Fribur kantonuna daxil olan Kerzers şəhərində sərnişin avtobusunda baş verən yanğın faciə ilə nəticələnib.
"Operativ Məlumat Mərkəzi-OMM" xəbər verir ki, yerli hüquq-mühafizə orqanlarının verdiyi məlumata görə, hadisə nəticəsində azı 6 nəfər həyatını itirib.
Polisin ilkin versiyasına görə, yanğın qəsdən törədilmiş ola bilər.
Hadisə çərşənbə axşamı yerli vaxtla saat 18:25 radələrində, paytaxt Bern şəhərindən təxminən 20 kilometr məsafədə yerləşən yerli yolda baş verib.
Şahidlərin ifadələrinə görə, avtobusdakı sərnişinlərdən biri öz üzərinə yanacaq tökərək özünü yandırıb.
Fribur polisinin sözçüsü Frederik Papo bildirib ki, hazırda əldə olan faktlar hadisənin avtobusun daxilindəki bir şəxs tərəfindən qəsdən törədildiyini göstərir. Digər rəsmi nümayəndə Krista Bilman isə insidentin terrorla əlaqəli olub-olmadığını müəyyən etmək üçün hələ tez olduğunu vurğulayıb.
Faciə zamanı 3 nəfər, o cümlədən bir xilasedici müxtəlif dərəcəli xəsarətlərlə xəstəxanaya yerləşdirilib.
Digər sərnişinlər isə alovdan qaçaraq xilas ola biliblər. Hələlik ölənlərin şəxsiyyəti barədə rəsmi məlumat verilməyib.
İsveçrə Prezidenti Qay Parmelin "X" sosial şəbəkəsindəki hesabında başsağlığı verərək hadisədən sarsıldığını bildirib:
"İsveçrədə növbəti dəfə ağır yanğın hadisəsində insanların həyatını itirməsi məni şoka saldı və kədərləndirdi".
Xatırladaq ki, bu, son aylarda İsveçrədə baş verən yeganə irimiqyaslı yanğın deyil. Yanvar ayında Krans-Montana kurortundakı barların birində baş verən yanğın 41 nəfərin həyatına son qoymuşdu. Hazırda Kerzersdəki hadisə ilə bağlı araşdırmalar davam edir.
