İsveç hökuməti 2026-cı ildə Ukraynaya enerji sahəsində dəstək məqsədilə 1 milyard İsveç kronu ayıracaq.
“Operativ Məlumat Mərkəzi – OMM” xəbər verir ki, bu barədə SVT portalına İsveçin İnkişaf və Xarici Ticarət naziri Benjamin Dous məlumat verib. Ayrılan vəsaitin həcmi 110 milyon ABŞ dollarından çoxdur.
Nazirin sözlərinə görə, İsveçin yardımı Ukraynanın enerji təchizatının bərpası üçün dərhal zəruri olan elektrik stansiyalarına, qızdırıcı avadanlıqlara və ehtiyat hissələrinə yönəldiləcək.
Qeyd edək ki, yanvarın 27-də Ukraynanın Baş nazirinin birinci müavini və energetika naziri Denis Şmıxal Kiyevdə 710 min abonentin elektrik enerjisiz qaldığını açıqlamışdı. Onun sözlərinə görə, paytaxtda hələ də elektrik enerjisinin verilməsi ilə bağlı əvvəlcədən planlaşdırılan qrafiki tam icra etmək mümkün olmayıb.
