OMM Redaksiyası
İspaniya parlamenti ölkədəki mənzil böhranını yüngülləşdirməyə yönələn hökumət paketini təsdiqləyib. AnewZ-nin məlumatına görə, səsvermə 12 noyabr, cümə axşamı, işçilərin mənzil xərclərinin artmasına etiraz olaraq 14 ildə ilk ümumi tətil keçirməsindən bir gün sonra baş tutub.
Qəbul olunan tədbirlər həssas vəziyyətdə olan insanların 2030-cu ilin sonunadək evdən çıxarılmaqdan qorunmasını nəzərdə tutur. 2028-ci ilin sonunadək başa çatmalı olan bəzi kirayə müqavilələri uzadılacaq, bəzi kirayə artımlarına isə 2027-ci ilin sonunadək məhdudiyyət qoyulacaq.
Kirayə haqqını endirən ev sahiblərinə vergi güzəştləri tətbiq ediləcək. Tələbatın yüksək olduğu ərazilərdə mənzillərini turistlərə kirayə verənlər isə cərimələrlə üzləşəcək.
Kirayə müqavilələrinin avtomatik uzadılmasını nəzərdə tutan təklif qəbul edilməyib. Xalq Partiyası (PP) və “Vox” da daxil olmaqla bir sıra partiyalar onun əleyhinə səs verib.
Mənzil məsələsi seçki kampaniyasının əsas mövzusudur
Təklifin rədd edilməsi mənzil məsələsini yenidən seçilmək kampaniyasının mərkəzinə çıxaran İspaniyanın mərkəz-solçu PSOE partiyası və baş nazir Pedro Sançes üçün geriləmədir. Sançes səsverməni təyin etdikdən sonra keçirdiyi ilk mitinqdə “Hər nəslin öz mübarizəsi var — bizim mübarizəmiz mənzil uğrundadır” deyib.
İspaniyada seçkilər noyabrın 29-da keçiriləcək. Sorğuların əksəriyyətində PSOE sağçı PP-dən geri qalır. Bununla belə, PP-nin çoxluq qazanacağı gözlənilmir və hökumət qurmaq üçün ifrat sağçı “Vox”un dəstəyinə ehtiyac duya bilər. PP hakimiyyətə gələrsə, qəbul olunmuş tədbirləri ləğv edəcəyini vəd edib.
Ümumi tətil nəqliyyatın işini pozub
Noyabrın 11-də, çərşənbə günü, milyonlarla işçi 24 saatlıq ümumölkə tətilində iştirak edib. Tətil ictimai nəqliyyatın işində pozuntulara səbəb olub, çoxsaylı müəssisə və mağazalar gün ərzində fəaliyyətini dayandırıb.
İspaniyanın UGT və CCOO həmkarlar ittifaqları tətili ölkədəki mənzil böhranına etiraz olaraq təşkil ediblər. Sentyabrda Madriddə 87 yaşlı Mariarmen Abaskalın evdən çıxarılmasından sonra məsələ ölkə gündəminin əsas mövzularından birinə çevrilib. Təqaüdçü qadın bir neçə gün sonra vəfat edib.
“YouGov” bazar araşdırmaları şirkətinin oktyabrda keçirdiyi sorğulara əsasən, ispaniyalıların 53 faizi mənzil məsələsini ölkənin qarşısında duran ən vacib problem hesab edir.
