OMM Redaksiyası
İran yeni yeraltı raket və pilotsuz uçuş aparatı bazasını təqdim edib. Hörmüz boğazında neft tankerlərinin dəniz minalarına düşməsi və ABŞ-la gərginliyin davam etməsi fonunda Tehran mümkün hücuma sərt cavab verəcəyini bildirib.
“AnewZ”in məlumatına görə, İran parlamentinin sədri Məhəmməd Baqir Qalibaf İİKK-nın obyektinin açılışını yüksək qiymətləndirib. O deyib ki, bu, Tehran hücuma məruz qalacağı təqdirdə “istənilən hərbi qarşıdurmanın coğrafiyasını müəyyən edəcəyinə” dair ölkənin rəqiblərinə aydın xəbərdarlıqdır.
“Hesablamalarınızda səhvə yol verməyin. Əgər versəniz, İran özünü sürətlə və təsəvvür etdiyinizdən daha geniş miqyasda müdafiə etməkdən çəkinməyəcək”, – ABŞ-İran sülh danışıqlarında İranın baş müzakirəçisi olan Qalibaf bildirib.
Bazanın təqdimatı münasibətilə yaydığı mesajda Qalibaf “raket şəhəri” adlandırılan obyektin müdafiəyə hazırlıq, davamlı tərəqqi və milli birlik vasitəsilə dayanıqlı çəkindirmə qabiliyyəti yaratmaq səylərinin bir hissəsi olduğunu deyib.
İran yeraltı raket imkanlarını nümayiş etdirib
İİKK yeraltı raket və pilotsuz uçuş aparatı obyektini çərşənbə axşamı təqdim edib, lakin onun yerini açıqlamayıb.
Təqdimat mərasimində çıxış edən İİKK-nın Aerokosmik Qüvvələrinin komandanı, briqada generalı Məcid Musəvi deyib: “Lazım gələrsə, İran regionda və onun hüdudlarından kənarda düşmənlərin bütün imkanlarını sıradan çıxaracaq”.
Musəvi İran raketlərinin düşmənləri məğlubiyyətə və alçaldılmaya sürükləyəcəyini bildirib. “Düşmənlərimizə qarşı gücümüzü, dözümümüzü və qətiyyətimizi göstərəcək, onları hər hansı səhvdən çəkindirəcəyik”, – o deyib.
İranın geniş raket proqramına ölkədə istehsal edilən birdəfəlik zərbə və döyüş bölgəsində dövrə vuran pilotsuz uçuş aparatları, qanadlı raketlər, eləcə də 2 000 kilometrədək mənzilli ballistik raketlər daxildir.
Tehran bu silahlardan İsrail və ABŞ-la 2025 və 2026-cı illərdəki münaqişələr zamanı istifadə edib, İsrailə, eləcə də regiondakı ABŞ hərbi bazalarına və maraqlarına raket zərbələri endirib.
İran silah arsenalını qorumaq üçün ölkənin müxtəlif yerlərində geniş yeraltı raket obyektləri tikib. Əvvəllər yayımlanmış görüntülərdə bu komplekslərin içərisi qismən göstərilib. Yeni görüntülərdə isə yüksək rütbəli İran hərbçiləri və İİKK komandirlərinin hərbi ciplə bazanı gəzdiyi görünür.
Raket istehsalı yeraltına köçürülüb
Tehran hərbi istehsal müəssisələrini gələcək hücumlardan qorumaq səylərini də gücləndirib. 2025-ci ilin iyununda baş vermiş 12 günlük müharibə və 2026-cı ildəki 40 günlük münaqişə zamanı raket istehsalı xətlərinə və zavodlara zərbələr endirildikdən sonra İran onların hücumlara həssaslığını azaltmaq üçün istehsal müəssisələrini yeraltına köçürüb.
İİKK-nın sözçüsü Hüseyn Möhebbİ şənbə günü İranın Aerokosmik Həftəsi münasibətilə keçirilən mətbuat brifinqində bu addımı təsdiqləyib. O, İnqilab Keşikçilərinin ballistik raketlərinin mənzilini artıq 2 000 kilometrlə məhdudlaşdırmayacağını da bildirib.
Əvvəlki məhdudiyyəti 2026-cı il fevralın sonlarında İsrail və ABŞ-ın birgə hava zərbələrində öldürülən sabiq ali rəhbər ayətullah Əli Xamenei tətbiq etmişdi.
İranın ballistik raket imkanları və mülki nüvə proqramı Vaşinqtonla danışıqlarda əsas fikir ayrılığı mövzuları olaraq qalır. Hər iki məsələ Hörmüz boğazındakı hərbi qarşıdurmadan əvvəlki gərginliyin mərkəzində olub, vasitəçilik edilən danışıqlarda isə onların həlli istiqamətində az irəliləyiş əldə edilib.
İİKK Hörmüz boğazında tankerlərin partladığını bildirib
Bazanın təqdimatı Hörmüz boğazında gərginliyin davam etdiyi vaxta təsadüf edib. İİKK strateji su yolundan keçməyə çalışan neft tankerləri ilə bağlı daha bir neçə partlayış barədə məlumat yayıb.
İİKK Hərbi Dəniz Qüvvələrinin çərşənbə axşamı gec saatlarda yaydığı bəyanata görə, daha bir tanker boğazdan icazəsiz marşrutla keçməyə çalışarkən dəniz minasına düşərək partlayıb.
“Hörmüz boğazının cənub hissəsində ABŞ-ın ‘qaçaqmalçılar ordusunun’ radar və sahil naviqasiya sistemləri məhv edildikdən sonra qaydanı pozan tankerlər qeyri-qanuni marşrutla keçməyə çalışır, əvvəlkindən dəfələrlə artıq riskə gedirlər”, – İİKK-nın “Sepah News” nəşrində dərc olunan bəyanatında deyilir.
Çərşənbə günü qurum daha iki tankerin partladığını bildirib və gəmilərin ABŞ hərbçilərinin dəstəyi ilə boğazdan gizli çıxmağa çalışdığını iddia edib.
İİKK-nın məlumatına görə, tankerlər “yırtıcı və təcavüzkar ABŞ ordusunun qırıcılarının dəstəyi ilə Hörmüz boğazının icazəsiz və təhlükəli marşrutunu gizli şəkildə tərk etməyə çalışarkən” dəniz minalarına düşərək güclü partlayışa məruz qalıblar.
İİKK Hərbi Dəniz Qüvvələri gəmilərin naviqasiya və tanınma sistemlərini söndürdüyünü, ABŞ hərbi zabitinin göstərişi ilə boğazdan keçməyə çalışdığını iddia edib.
“Dəniz minaları bu qaçaqmalçıların qarşısını aldı və CENTCOM-un terrorçu komandanı Bred Kuperin qara siyahısına daha bir səhifə əlavə etdi”, – bəyanatda bildirilir.
Bəyanatda, həmçinin, “cinayətkar və çarəsiz ABŞ hərbçilərinin yalanlarını sübut etmək üçün Hörmüz boğazının kənarında helikopterdən media şousu göstərməsinə ehtiyac yoxdur. Boğazın havadan çəkilmiş fotoları hər şeyi senzurasız göstərir” deyilir. Bu ifadə Kuperin oktyabrın 25-də ABŞ ordusuna məxsus CH-47 Chinook helikopterində boğaza səfərinə aid edilib.
