Afət Ziyadqızı
İranda ali lider Ayətullah Əli Xameneinin vəfatından sonra keçiriləcək vida mərasiminə hazırlıqlar yekun mərhələyə çatıb. Bir neçə gün davam edəcək mərasimdə dünyanın müxtəlif ölkələrindən yüksək səviyyəli nümayəndə heyətlərinin iştirakı gözlənilir.
“Operativ Məlumat Mərkəzi-OMM” xəbər verir ki, İran rəsmiləri ali lider Ayətullah Əli Xameneinin iyulun 4-dən 9-dək keçirilməsi planlaşdırılan dəfn mərasiminə hazırlıqları başa çatdırıb.
Məlumata görə, mərasim zamanı kütləvi toplaşmaların gözlənilməsi səbəbindən təhlükəsizlik tədbirləri ən yüksək səviyyəyə çatdırılıb. Eyni zamanda, mərhum ali liderin tabutunun ilk görüntüləri də ictimaiyyətə təqdim olunub.
Bildirilir ki, vida mərasimində iştirak etmək üçün 100-dən çox ölkədən nümayəndə heyətlərinin Tehrana gəlməsi gözlənilir. Pakistanın daxili işlər naziri Seyid Möhsün Nəqvi İrana səfəri zamanı bu ölkəni “ikinci ev” adlandırıb. Həmçinin, Pakistanın Baş naziri Şahbaz Şərifin də mərasimdə iştirak edəcəyi gözlənilir.
Məlumata əsasən, Livandan olan rəsmi nümayəndələr, o cümlədən “Amal” hərəkatının yüksək vəzifəli şəxsləri İran parlamentinin sədri Məhəmməd Baqir Qalibaf ilə görüş keçirərək ikitərəfli münasibətləri və parlamentlərarası əməkdaşlıq məsələlərini müzakirə ediblər.
Eyni zamanda, ABŞ ilə İran arasında aparılan danışıqlar da beynəlxalq gündəmin əsas mövzularından biri olaraq qalır. ABŞ Prezidenti Donald Tramp “CNBC” telekanalına açıqlamasında danışıqların müsbət istiqamətdə davam etdiyini və Tehranın Vaşinqtonun irəli sürdüyü tələblərin böyük hissəsini qəbul etdiyini bildirib.
ABŞ Prezidenti vurğulayıb ki, Vaşinqtonun məqsədi İranda rejim dəyişikliyi deyil, lakin İranın nüvə silahına sahib olmasına imkan verilməyəcək. Qətər və Pakistan vasitəçiləri isə növbəti danışıqlar raundunun dəfn mərasimlərindən sonra keçiriləcəyini açıqlayıblar.
