OMM Redaksiyası
İngiltərənin Oksfordşir qraflığındakı Piddinqton kəndinin sakinləri hökumətin sığınacaq axtaran şəxslərin yerləşdirilməsi planına etiraz olaraq Böyük Britaniyadan “ayrılmaq” məsələsi ilə bağlı simvolik referendum keçiriblər.
Təxminən 350 sakinin yaşadığı kənddə keçirilən hüquqi qüvvəsi olmayan səsvermədə sakinlərdən Piddinqtonun “Böyük Britaniyadan ayrılmasını və öz müqəddəratını təyin etmə yolunu seçməsini” dəstəkləyib-dəstəkləmədikləri soruşulub. Referendum kəndin ölkədən ayrılmasına səbəb ola bilməz.
Təşkilatçılar qeyri-adi addımı hökumətin MoD Bicester ərazisinin bir hissəsində 1 256 yetkin kişi sığınacaq axtaran şəxsi yerləşdirmək planına diqqəti artırmaq cəhdi kimi təqdim ediblər.
Sakinlər bildirirlər ki, bu qədər insanın kiçik icmanın yaxınlığında yerləşdirilməsi yerli infrastruktura təzyiq göstərə və təhlükəsizliklə bağlı problemlər yarada bilər. Piddinqtondan 130-dan çox qadın planla bağlı narahatlıqlarını və bunun icmaya mümkün təsirini ifadə edən məktubla Vestminsterdəki qadın deputatlara müraciət edib.
“Home Office” bildirib ki, “Bicester” layihəsi həyata keçiriləcəyi təqdirdə sığınacaq axtaran şəxslərin, işçilərin və yerli sakinlərin təhlükəsizliyi prioritet olacaq.
Biznes naziri Conatan Reynolds “ITV” telekanalına müsahibəsində narahatlıqları başa düşdüyünü deyib. O, keçmiş hərbi obyektlərin otellərdən istifadənin davam etdirilməsinə alternativ olduğunu bildirib: “Bu insanların gedə biləcəyi xəyali bir yer yoxdur”.
Reynolds sığınacaq axtaran şəxslərin yerləşdirilməsi məsələsinin nə xoş, nə də asan olduğunu qeyd edib. Leyboristlər hökuməti siyasi mübahisələrə və Britaniyanın müxtəlif bölgələrində etirazlara səbəb olan sığınacaq otellərindən istifadəyə son qoymağı vəd edib.
Hökumətin məlumatına görə, 2026-cı ilin iyun ayının sonunda təxminən 16 min sığınacaq axtaran şəxs otellərdə yerləşdirilib. Təklif olunan “Bicester” mərkəzi sığınacaq axtaran şəxslərin keçmiş hərbi obyektlər də daxil olmaqla alternativ məkanlara köçürülməsi planının bir hissəsidir.
Simvolik referendumun nəticələrinin çərşənbə günü açıqlanacağı gözlənilir.
