Hönes Kompaninin “Bavariya”ya nə vaxt qayıda biləcəyini açıqlayıb

“Bavariya”nın fəxri prezidenti Uli Hönes baş məşqçi Vensan Kompaninin səhhəti və işə qayıdış vaxtı ilə bağlı danışıb. Hönes onun yaxın beynəlxalq fasilədən sonra yenidən məşqçi skamyasında olacağını gözləyir.

“Biz vəziyyətdən çox narahatıq. Amma Kompaninin səhhətinin o qədər də ağır olduğunu düşünmürəm. Məncə, əvvəlcə uzun sürən qrip keçirib və tam sağalmağa macal tapmayıb. Daha sonra meningit yaranıb. Bu xəstəlik müalicə olunur”, – Hönes Welt-ə bildirib.

O, Kompaninin güclü stress keçirdiyini və gündə 12 saat işlədiyini də deyib. Hönesin fikrincə, məşqçi iki-üç həftə ərzində, beynəlxalq fasilədən sonra komandanın başına qayıda bilər.

Daha əvvəl Kompaninin komandanın məşqini izləyərkən huşunu itirdiyi və xəstəxanaya yerləşdirildiyi bildirilmişdi.