"Heç bir ölkə həm hakim, həm də mübahisənin tərəfi olmamalıdır"

İspaniyanın Baş naziri Pedro Sançes Birləşmiş Millətlər Təşkilatının (BMT) rolunun gücləndirilməsinə çağırıb.

“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.

O bunun üçün Təhlükəsizlik Şurasında islahatların aparılmasının, o cümlədən beş daimi üzvün veto hüququnun ləğv edilməsinin vacibliyini vurğulayıb.

İspaniya hökumətinin başçısı bildirib ki, bu addımlar çoxtərəfli sistemin yenilənməsinə və gücləndirilməsinə xidmət edə bilər.

"Biz çoxtərəfli sistemə inamımızı ikiqat artırmalıyıq. Onu yeniləməli və gücləndirməliyik ki, XXI əsrdə də XX əsrdə olduğu kimi mərkəzi rol oynaya bilsin.

Təhlükəsizlik Şurasında islahat aparmalı, dünyanın bütün regionlarının ədalətli təmsilçiliyini təmin etməli və daimi üzvlərin veto hüququnu ləğv etməliyik. Çünki BMT Nizamnaməsində də qeyd olunduğu kimi, heç bir ölkə, nə qədər güclü olmasından asılı olmayaraq, eyni zamanda həm hakim, həm də mübahisənin tərəfi olmamalıdır", - Sançes deyib.