OMM Redaksiyası
Fransanın daxili işlər naziri Loran Nunez cümə günü bildirib ki, şənbə günü ölkə üzrə asayişin qorunması üçün 70 min təhlükəsizlik əməkdaşı səfərbər ediləcək. “AnewZ”in məlumatına görə, nazir ifrat solçular tərəfindən talan və zorakılığa çağırışların olduğunu deyib.
Nunez jurnalistlərə sosial şəbəkələrdə ictimai binaların hədəfə alınmasına çağırışların yayıldığını söyləyib. O, hakimiyyətin şənbə günü sərt davranmağa hazır olduğunu və heç bir qanun pozuntusuna dözməyəcəyini vurğulayıb.
Fransa Prezidenti Emmanuel Makron ötən həftəsonu baş verən iğtişaş və talanlara görə “qiyamçı” ifrat solçu qrupları və vandalları günahlandırıb. “Reuters”in məlumatına görə, o, kəşfiyyat rəhbərləri və yüksək vəzifəli nazirlərlə görüşdən sonra ötən şənbə respublikanı devirməyi hədəfləyən siyasi və qiyamçı hərəkətlərin baş verdiyini deyib.
Makron həmkarlar ittifaqları kimi qrupların təşkil etdiyi nümayişlərə icazə veriləcəyini, lakin biznes obyektlərini qorumaq üçün onların marşrutlarının dəyişdirilə biləcəyini bildirib. Prezidentin cümə günü müdafiə şurasının iclasına sədrlik edərək əlavə tədbirləri müzakirə etməsi də planlaşdırılır.
2 700-dən çox saxlanılan şəxs
Ədliyyə naziri Jerald Darmanen cümə axşamı şənbə günündən bəri təxminən 2 700 nəfərin saxlanıldığını, 1 000-dən çox şəxsin məhkəmə qarşısına çıxarıldığını deyib. Sürətləndirilmiş məhkəmə proseslərindən sonra 217 nəfər həbs cəzası alıb. Nazir bu sayın sürətlə artmaqda davam etdiyini bildirib.
Darmanen Paris yaxınlığındakı Fleuri-Meroji həbsxanasının qarşısında jurnalistlərə məhkum edilənlərin yarısının əvvəllər cinayət məsuliyyətinə cəlb olunmadığını, onların əksəriyyətinin 18-25 yaşlı kişilər olduğunu söyləyib.
Bəzi vəkillər sürətləndirilmiş məhkəmə dinləmələrini tənqid edərək hökuməti hakimlərə daha ağır cəzalar vermələri üçün təzyiq göstərməkdə ittiham ediblər.
Fransa rəsmiləri və media Limoges şəhər meriyasına edilən yanğın hücumu ilə bağlı iki nəfərin saxlanıldığını bildiriblər.
Bir sıra şəhərlərdə nümayişlər qadağan edilib
Fransanın ikinci böyük şəhəri Lionda yerli hakimiyyət orqanları şənbə günü keçirilməsi planlaşdırılan bütün etirazları qadağan edib. Ötən həftəsonu şəhərdə 200-300 mağaza talan edilmişdi. Qrenobl, Ruan, Le Havr və Tulon da daxil olmaqla bir sıra şəhərlərdə mərkəzi ərazilərdə etirazlara məhdudiyyət qoyulub.
Parisdə cümə axşamı keçirilməsi planlaşdırılan tələbə etirazı qadağan edilsə də, AFP-nin məlumatına görə, fövqəladə məhkəmə sonradan qadağanı ləğv edib. İcazəsiz toplaşmaların qarşısını almaq məqsədilə nəqliyyat qurumları mərkəzdəki metro stansiyalarını bağlayıb.
Əsas tələbə ittifaqı UNEF şənbə günü mitinqlər keçirilməsinə çağırıb, “Sarı jiletlilər” hərəkatı isə Parisin mərkəzindən keçən yürüş üçün müraciət edib. AFP yazır ki, təşkilatçılara şəhərin şərqindəki Bastiliyadan yola düşməyə icazə veriləcək, lakin mərkəzə daxil olmaq qadağan ediləcək. Daxili İşlər Nazirliyi ötən həftəsonu ilə müqayisədə 20 faiz çox polis əməkdaşı cəlb etməyi planlaşdırır.
Reuters-in məlumatına görə, Parisin mərkəzindəki mağazalar vitrinlərini qoruyucu lövhələrlə örtməyə başlayıb, “Hermès” şirkəti isə Fransadakı mağazalarında təhlükəsizlik tədbirlərini gücləndirib. Yerli komendant saatının tətbiq edildiyi ardıcıl üçüncü gecə ciddi insidentsiz keçib.
Həmkarlar ittifaqları həyatın bahalaşmasına və ictimai xidmətlərə ayrılan xərclərin azaldılmasına etiraz olaraq noyabrın 5-də ümummilli tətil keçirməyi də planlaşdırır. Baş nazir Sebastyan Lekornu ilə danışıqlar nəticəsiz başa çatıb.
İğtişaşlar maliyyə bazarlarına da təsir göstərir. Reuters-in məlumatına görə, Fransanın 10 illik dövlət istiqrazlarının gəlirliliyi cümə axşamı ekvivalent ABŞ istiqrazlarının gəlirliliyini ötüb. Bu, 2013-cü ildən bəri ilk belə haldır.
Oktyabrın 17-də Fransada keçirilən etiraz aksiyalarında yarım milyondan çox insan iştirak edib. Aksiyaların kənarında baş verən zorakılıq son illərdə ölkədəki ən ciddi şəhər iğtişaşlarından birinə çevrilib və təhlükəsizlik qüvvələrinin asayişi qorumaq imkanları ilə bağlı suallar yaradıb.
Etirazlar ötən ay məktəblərdə işçi çatışmazlığına görə başlayıb, daha sonra enerji xərclərinin kəskin artmasına, ailə büdcələrinə təzyiqə və ictimai xidmətlərin pisləşməsinə qarşı daha geniş hərəkat halını alıb.
