OMM Redaksiyası
Parisdəki Eyfel qülləsi əməkdaşların etirazından sonra sentyabrın 7-də gecikmə ilə fəaliyyətini bərpa edib. Etiraza səbəb hindu dini nümayəndə heyətinin səfəri zamanı qadın işçilərdən iş yerlərini tərk edərək görünməmələrinin istənilməsi olub.
Hadisə şənbə günü hindu təşkilatı "Bochasanwasi Akshar Purushottam Swaminarayan Sanstha" (BAPS) ilə əlaqəli təxminən 100 nəfərin səfəri zamanı baş verib. Həmkarlar ittifaqının nümayəndəsi Diane Davoine bildirib ki, nümayəndə heyəti keçərkən qadınlardan iş yerlərini tərk etmələri və onların yerini kişilərin tutması istənilib.
Davoine qeyd edib ki, həftəsonu yaranan gərginlikdən sonra əməkdaşlar rəhbərliklə görüşərək qadın işçilərlə belə rəftarın bir daha təkrarlanmayacağına dair təminat tələb ediblər. Onun sözlərinə görə, rəhbərlik hadisəyə görə əməkdaşlardan üzr istəyib.
Paris meri Emmanuel Gregoire araşdırmanın “mümkün qədər tez” başlanacağını açıqlayıb. O, əməkdaşların narazılığını haqlı adlandıraraq hadisənin bütün hallarının müəyyənləşdirilməsini tələb edib.
Milli Assambleyanın sədri Yael Braun-Pive də hadisəni tənqid edib. O, "X" platformasında yazıb: “Başqalarını qəbul etmək heç vaxt öz dəyərlərimizdən imtina etmək demək deyil. Fransada qadınlar ictimai həyatda tam şəkildə iştirak edirlər. Heç kim onlara görünməz olmağı diktə edə bilməz.”
BAPS nümayəndələri Paris ətrafında hindu məbədinin açılışı ilə bağlı tədbirlər üçün Fransada olublar. Təşkilatın açıqlamasına görə, nümayəndə heyətinin böyük olması və digər ziyarətçilər üçün narahatlığın azaldılması məqsədilə Eyfel qülləsinə səfər açılış saatlarının əvvəlinə planlaşdırılıb.
BAPS bildirib ki, onların məlumatına görə, heç kim Eyfel qülləsinə girişdən məhrum edilməyib. Təşkilat yaranmış narahatlığa görə “səmimi” şəkildə üzr istəyib. Eyfel qülləsini idarə edən SETE şirkəti isə hadisə ilə bağlı şərh verməyib.
Əməkdaşların görüş keçirdiyi vaxt qüllənin girişində açılışın “əməliyyat səbəblərinə görə” gecikdiyi barədə elan yerləşdirilib.
