Afət Ziyadqızı
Türkiyə Prezidenti Rəcəb Tayyib Ərdoğan Ankaradakı Qazi Anadolu Liseyində 2026–2027-ci tədris ilinin açılışı və şəhərdə tamamlanan təhsil investisiyalarının kollektiv açılış mərasimində çıxış edib.
“Operativ Məlumat Mərkəzi-OMM” xəbər verir ki, bu barədə Türkiyə mətbuatı məlumat yayıb.
Məlumata görə, Ərdoğan çıxışında Türkiyənin təhsil sahəsində əldə etdiyi nəticələrə toxunub. Onun sözlərinə görə, 91 ölkənin iştirak etdiyi PISA 2025 hesabatında Türkiyə elm, riyaziyyat və oxu üzrə göstəricilərini ən çox artıran ölkə olub. Türkiyə Prezidenti ölkənin hər üç sahə üzrə nəticələrinin 50 faiz artdığını bildirərək, bu göstəricinin müəllim, şagird və valideynləri sevindirməli olduğunu vurğulayıb.
Bildirilib ki, Ərdoğan təhsilə ayrılan büdcənin 15,33 faizə çatdırıldığını açıqlayıb. O, yeni məktəblərin tikintisinin və təhsil infrastrukturunun gücləndirilməsinin davam etdiriləcəyini diqqətə çatdırıb. Indiyədək şagirdlərə 4 milyard 300 milyondan çox dərslik təqdim olunduğu və bu investisiyaların əsas məqsədinin uşaqların bərabər, ədalətli təhsil imkanlarına çıxışını təmin etmək olduğu bildirilib. Türkiyə lideri gələcək nəsillərin milli dəyərləri tanımasının, süni intellektdən səmərəli istifadə etməsinin və “Maarif” modeli çərçivəsində tənqidi düşünən, fəzilətli nəslin yetişdirilməsinin vacibliyini qeyd edib.
