“Real”ın baş məşqçisi Karlo Ançelotti İspaniya La Liqasının 23-cü turunun “Atletiko” ilə oyunundan sonra (1:1) açıqlama verib.
"Operativ Məlumat Mərkəzi-OMM" klubun rəsmi saytına istinadən xəbər verir ki, o, rəqibin vurduğu qolun xüsusi bacarıq hesabına ərsəyə gəldiyini deyib:
“Futbolda nəzərə almalı olduğumuz bir neçə məqamlar var. Onlardan biri də rəqib komandanın xüsusi bacarıq hesabına qol vurmasıdır. Eyni ssenari onların da başına gəldi. "Atletiko"nun qolu komandamın əhval-ruhiyyəsini aşağı saldı. Ən yaxşı formada olmamağımız normaldır”.
Karlo Ançelotti “kral klubu”nun bərabərlik qolunun müəllifi olan Alvaro Rodriqes haqda fikir bildirib:
“Rodriqes bütün keyfiyyətlərini ortaya qoydu. Bu, onun üçün xüsusi gecə oldu. Biz onun komanda üçün faydalı olacağını anlamağa başlayırıq. Gələn mövsüm əsas komandada olacaq. Rodriqesdə olan keyfiyyətlər çox az futbolçuda var. Yaşına görə güclüdür. Yaxşı baş zərbələri var”.
“Real” hazırda İspaniya çempionatının turnir cədvəlində 52 xalla ikinci, “Atletiko” isə 42 xalla dördüncü sıradadır.