OMM Redaksiyası
Futzal üzrə Azərbaycan millisi DÇ-2028-in əsas mərhələsində bütün oyunlarda qələbə qazanmaq və qrup mərhələsini adlamaq üçün mübarizə aparacaq. Bu barədə komandanın baş məşqçisi vəzifəsini müvəqqəti icra edən Elvin Quliyev bildirib.
Onun sözlərinə görə, qrupdakı Çexiya və Latviya yığmaları son Avropa çempionatının əsas mərhələsində iştirak ediblər və güclü kollektivlərdir. Quliyev rəqiblərin favorit görünməsinə baxmayaraq, Azərbaycan millisinin hər görüşdə maksimum nəticə üçün çalışacağını deyib.
Baş məşqçi səlahiyyətlərini icra edən mütəxəssis heyətdə ciddi zədəli oyunçunun olmadığını vurğulayıb. Futbolçularda mikrozədələr olsa da, onların məşqlərə və oyunlara ciddi maneə yaratmadığını bildirib. Komanda sentyabrdan hazırlıq keçir: ilk mərhələdə fiziki, ikinci mərhələdə texniki-taktiki məşqlərə üstünlük verilib, üçüncü mərhələdə isə rəqibə qarşı hazırlıq aparılıb. Quliyev hazırda komandanın vəziyyətinin yaxşı olduğunu qeyd edib.
Çexiya – Azərbaycan matçı oktyabrın 16-da Bakı vaxtı ilə saat 22:00-da Fridek-Mistek şəhərindəki “Hala Polarka” idman arenasında keçiriləcək.
